Sápıev tusaýyn kesken sábı boks qolǵabyn tańdady
Kezdesýdi «Rýhanı jańǵyrý» baǵdarlamasy aıasynda jáne QR Tuńǵysh Prezıdenti kúni qarsańynda EUÝ Qazaqstan halqy Assambleıasy kafedrasy uıymdastyrǵan.
«Serik Sápıev - bilimdi, eńbekqor, tabysty qazaqstandyqtardyń biri. QR Tuńǵysh Prezıdenti kúni qarsańynda stýdentter úshin elimizdiń kók týyn jelbiretken talapty sportshy, Parlament minberinde el múddesin kóterip júrgen patrıot depýtatpen kezdesý uıymdastyryp otyrmyz», - deıdi kezdesýdiń júrgizýshisi Anatolıı Bashmakov.
Erkin sıpatta ótken kezdesýde Sápıev stýdentter suraǵyna jaýap berip, óz estelikterimen, tabystarǵa jetý syry jóninde aqyl-keńesterimen bólisti.
Sondaı-aq, atalǵan kezdesýde ýnıversıtet qyzmetkeri dańqy chempıonǵa ulynyń tusaýyn kesý jóninde ótinish bildirdi. Sápıev ótinishti jerde qaldyrmady jáne ala jipti óz qolymen baılap, 1 jastar Áltaıyrdyń tusaýyn kesti.
Bir qyzyǵy, kishkentaı Áltaıyr kitap, aqsha, qamshynyń arasynan boks qolǵabyn tańdady.
Sápıev muny jaqsy yrymǵa balady jáne sábıge aq jol tiledi.
Sondaı-aq, kezdesýde Sápıev Olımpıada jeńiske jetý úshin 17 jyl ter tókkenin, sportshyǵa tózimdilik pen tabandylyqtyń aýadaı qajet ekenin atap ótti.
«Men týyp-ósken Abaı qalasynda boks mektebi jaqsy damyǵan. Ondaǵy árbir úshinshi turǵyn bir kezderi bokspen aınalysqan bolyp shyǵatyn. Ózim boksqa 10 jasymda keldim. Jolym bolyp, jaqsy ustazdarǵa tap boldym. Ári qatal, ári meıirimdi Aleksandr Strelnıkovtiń sabaǵyn aldym. Ol bizdi bosańsyp ketpesin dep, 31 jeltoqsan men 1 qańtar kúnderi de jattyqtyryp qoıatyn», - deıdi chempıon.
Sonymen birge, stýdenttermen kezdesýde Sápıev sátsizdikterge moıymaýdy, kez kelgen oqıǵanyń utymdy tustaryn kóre bilý qajettigin basa aıtty.
Sporttyq baǵyttaǵy mektepti bitirgen soń, ýnıversıtetke túskim keldi. Ata-anam da joǵary bilim alǵanymdy qalady. Biraq oqýǵa tóleıtin qarajat bolmady, grantqa da túse almadym. Sodan oqýdy keıinge qaldyryp, bos ýaqytymdy boksqa arnadym jáne alty aıdan keıin sport sheberi normatıvin oryndadym. Bul meniń aldaǵy taǵdyrymdy aıqyndaýǵa kómektesti. Keıinirek Qaraǵandy memlekettik ýnıversıtetine dene tárbıesi fakýltetine tústim.Taǵdyrdyń jazýy shyǵar. Eger sol joly oqýǵa túskende, boksty shetke ysyrar edim ǵoı», - dep óz sózin jalǵastyrdy S.Sápıev.
Serik Sápıev kez kelgen boksshy armandaıtyn ataq-dańqtarǵa jetistikterge qol jetkizgen. Ol 2004 jyly qaraǵandylyq boksshy áskerıler arasynda álem chempıony atanyp, óziniń alǵashqy iri jeńisine qol jetkizdi. Sol maýsymda ol 60 keli salmaq dárejesi boıynsha Qazaqstan chempıony atandy. 2005 jyly 64 keli salmaqqa aýysyp, Qytaıdyń Mınıan qalasynda ótken álem chempıonatynda el namysyn qorǵady. 2007 jyly AQSh elinde altyn medaldi jeńip alǵan Seriktiń esimi sporttyq shejiresinde eki márte álem chempıony atanǵan tuńǵysh qazaqstandyq boksshy retinde tirkeldi. 2012 jyly London Olımpıadasynda sharshy alań ıesi Freddı Evansty 17:9 esebimen tize búktirip, chempıon atandy jáne Olımpıadanyń eń úzdik boksyshyna beriletin Barker kýbogyn ıelendi. 2013 jyly sport salasyndaǵy erekshe jetistikteri úshin otandasymyz «Sport boıynsha ıÝNESKO chempıony» qurmetti ataǵyna qol jetkizdi.
