Sápıev Qaraǵandyda olımpıadalyq rezervtegi sport mektebin ashýdy usyndy
ASTANA. QazAqparat - Parlament Májilisiniń depýtaty Serik Sápıev Qaraǵandydaǵy jas sportshylardyń máselesin kóterip, QR Mádenıet jáne sport mınıstri Arystanbek Muhamedıulyna depýtattyq saýal joldady, dep habarlaıdy «QazAqparat» HAA tilshisi.
«Mysal retinde Qaraǵandy oblysyndaǵy Á.Moldaǵulova atyndaǵy daryndy balalarǵa arnalǵan mamandandyrylǵan mektep-ınternatyn keltirýge bolady. Mektepte búgin sporttyń 13 túri boıynsha 7-11 synyp aralyǵynda oqıtyn 438 sportshy bar. Joǵary bilikti 25 jattyqtyrýshy-muǵalim sabaq beredi. Muǵalimderdiń 70 paıyzy joǵary kategorııaly. Mektepte jeke sporttyq baza, medıtsınalyq-tárbıelik oqý korpýsy bar. Biraq, oqý aıaqtalǵannan keıin kóptegen túlekter, ásirese az qamtylǵan otbasylardyń balalary JOO-ǵa túse almaı jatady. Osy sebepti, bolashaqtan úmiti zor sportshynyń ózi kedergige tap bolýy múmkin», - deıdi depýtat.
Serik Sápıevtiń aıtýynsha, mektep túlekteriniń RF-ǵa qonys aýdarýy jıilep barady. 2015 jyly Reseıge atalǵan mektepten 7, 2016 jyly 8 bala ketip qalǵan. Bir oqýshyǵa jylyna shamamen 1,5 mıllıon teńge ketse, 7-11 synyp aralyǵyndaǵy 5 jylda - árbir oqýshyǵa 7,5 mıllıon teńge jumsalatyn kórinedi.
«Osyǵan baılanysty oblystyq mektep-ınternatty olımpıadalyq rezervtegi oblystyq mektep-ınternat kolledji retinde ashý qajettiligi týyndaıdy. Bul sporttyq rezervtiń úzdiksiz daıyndyǵyn qamtamasyz etýge, jasóspirimder sportyn joǵary nátıjeli sportqa aınaldyrýǵa, oblys sportshylaryn ulttyq qurama sapynda biliktiligin arttyrýǵa, joǵary bilikti jattyqtyrýshylardy daıyndaýǵa múmkindik beredi», - deıdi ol.
Májilismenniń aıtýynsha, oblystyq dene shynyqtyrý jáne sport basqarmasynyń málimetine sáıkes, 2017 jyly Qaraǵandy oblysynda ǵana 9 aýdan boıynsha 76 nusqaýshy qajet.
«Oblystyq mektep-ınternat kolledjdiń ashylýy Qazaqstan Prezıdentiniń 2018 jylǵy Joldaýyn, «Barlyǵy úshin tegin kásibı-tehnıkalyq bilim berý» baǵdarlamasyn júzege asyrýǵa múmkindik beredi. Osy máseleni jan-jaqty qarastyrýdy ótinemiz», - dep túıdi májilismen.
