Sápıev: 21 ǵasyrda densaýlyǵy myqty ult qana básekege qabiletti
ASTANA. QazAqparat - Búgin Astanada QR Prezıdentiniń «Bolashaqqa baǵdar: rýhanı jańǵyrý» atty maqalasyn talqylaýǵa arnalǵan konferentsııada Májilis depýtaty, Olımpıada chempıony Serik Sápıev Elbasynyń barlyq bastamalary ýaqtyly júzege asyrýdy qajet etetin mańyzdy qadamdar ekenin aıtty, dep habarlaıdy QazAqparat.
«Eń bastysy, Memleket basshysy kezekti ret salaýatty ómir saltyn ustanýdyń qajettigi men mańyzdylyn atap ótti. Densaýlyǵy myqty ult qana 21 ǵasyrda básekege qabiletti bola alady. Prezıdenttiń «Týǵan jer» baǵdarlamasyn ázirleý, «Qazaqstannyń qasıetti rýhanı qundylyqtary», «100 jańa esim», «Jańa gýmanıtarlyq bilim. Qazaq tilindegi 100 jańa oqýlyq» jobalaryn tolyqtaı qoldaımyn. Elbasy maqalasynda atap kórsetilgen ıdeıalarǵa elimizdiń bolashaǵyna beı-jaı qaramaıtyn mıllıondaǵan qazaqstandyqtar qoldaý bildirip, pikirlerin aıtty. Baǵdarlamalyq maqalasynda Nursultan Ábishuly latyn álipbıine kóshý jaıynda sóz qozǵaǵan. Osy baǵyttaǵy qadam kezeń-kezeńmen iske asyrylatyny túsinikti. Biz oǵan Táýelsizdik alǵannan beri daıyndaldyq»,-dedi Sápıev.
Onyń paıymynsha, ulttyq sanany jańǵyrtý adamdy damytýdyń mańyzdy qadamy. Osy rette azamattardyń básekege qabilettiligi, ulttyq biregeılik, bilim mádenıeti negizgi basymdyqtar bolyp otyr.
Sóz sońynda Sápıev Qazaqstanda tarıhı eskertkishter kóp ekenin jáne olar álemde keńinen nasıhattalmaı jatqandyǵyn eske salyp ótti. Sondyqtan da Qazaqstannyń ımıdjin kóterý men halyqaralyq mártebeni arttyrý turǵysynda eldiń mádenı murasyn tanystyrýǵa umtylýy qajettigin jetkizdi.
