Sapasyz taýarlardy qaıtarý máselesi zańdyq deńgeıde retteledi
ASTANA. QazAqparat - Sapasyz taýarlardy qaıtarý máselesi zańdyq deńgeıde retteledi. Bul týraly búgin Májiliste «Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn tanystyrǵan Ulttyq ekonomıka vıtse-mınıstri Tımýr Jaqsylyqov málim etti.
Vıtse-mınıstrdiń aıtýynsha, zań jobasynda tutynýshylardyń quqyqtaryn qorǵaý jáne halyqtyń sanıtarııalyq-epıdemıologııalyq salamattylyǵy jónindegi ýákiletti organnyń fýnktsııalaryn bekitýge, sondaı-aq tutynýshylardyń quqyqtaryn qorǵaý týraly zańnamany odan ári jetildirýge baǵyttalǵan.
«Búgingi tańda tutynýshylardyń quqyqtaryn qorǵaý jónindegi ýákiletti organ óziniń ókilettikterin tolyq paıdalanýǵa quqyǵy bolmaı otyr. Osyǵan baılanysty, zań jobasynda tutynýshylardyń quqyqtaryn qorǵaý jónindegi ýákiletti organǵa birqatar fýnktsııalaryn zańnamalyq deńgeıde bekitý kózdeledi. Bul rette ýákiletti organnyń fýnktsııalaryn belgileý, onyń ishinde ýákiletti organnyń memlekettik baqylaýdy júzege asyrýy boıynsha, ortalyq jáne jergilikti atqarýshy organdardyń tıisti ókilettikterin, tutynýshylardyń, satýshylardyń quqyqtary men mindetterin, tutynýshylardyń qoǵamdyq birlestikteriniń quqyqtaryn aıqyndaý qarastyrylady», - dedi vıtse-mınıstr.
Onyń aıtýynsha, zań jobasy aıasynda tutynýshylar quqyǵyna oraı, taýarlardy satý, qaıtarý men almastyrý talaptary da jetildiriledi. «Máselen, satyp alynǵan taýarlarǵa qatysty olqylyqtardy joıýdyń on kúndik merzimi tuńǵysh ret zańnama deńgeıinde aıqyndalyp otyr», - dedi T. Jaqsylyqov.
