Sapasyz salynǵan joldar qabyldanbaıdy – astana ákimi
NUR-SULTAN. QazAqparat – Nur-Sultan qalasynda joldy sapasyz salǵan merdigermen kelisimshart úzilip, jasaǵan jumysy qabyldanbaıdy. Bul týraly elorda basshysy Altaı Kólginov málim etti, dep habarlaıdy QazAqparat.
«Qala turǵyndarynyń ómir súrý jaılylyǵyn arttyrý úshin joldardy salyp, jóndeý mańyzdy. Elordadaǵy klımattyq jaǵdaıǵa baılanysty abattandyrý jáne jol jumystaryn júrgizý maýsymy qysqa. Jylytý maýsymy 7 aıǵa deıin sozylady. Degenmen qolaıly jaǵdaı týyndaǵannan keıin qalada joldardy jóndeý jáne aýdandardy abattandyrý boıynsha aýqymdy jumystar júrgizý bastalady», - dep jazdy qala ákimi Instagram-da.
Málim etilgendeı, bıyl 115 kóshe salynyp, jóndeledi.
«Ótken jyldaǵydaı qalanyń eski bóligi men eldi mekenderge basa nazar aýdaramyz. Jumystar qalanyń barlyq aýdandarynda júrgizilip jatyr. Búgin Bekturov kóshesiniń E67 kóshesinen E22 kóshesine deıingi (Esil aýdany) ýchaskesindegi qurylys jumystarynyń barysymen tanystym. Bul - salynyp jatqan jańa aýdandardyń biri. Jol qurylysy birden birneshe kóppáterli turǵyn úı keshenderiniń turǵyndaryna qolaıly jaǵdaı jasaýǵa múmkindik beredi. Merdigerge jumys qarqynyn báseńdetpeýdi tapsyrdym», - dedi A.Kólginov.
Qala basshysynyń aıtýynsha, sapasyz jóndelgen ne salynǵan joldar qabyldanbaıdy. Joldy merdiger óz esebinen qalpyna keltiredi. Budan basqa, jumysqa nemquraıly qaraıtyn kompanııalarmen kelisimshart úziledi.
Nur-Sultanda byltyr 170-ten astam kóshe jóndeldi. «Jumyspen qamtýdyń jol kartasy» baǵdarlamasy boıynsha 4 myńnan astam jumys orny quryldy.
