Sapasyz ónim: Qazaqstandyqtar bes kúnde 36 mln teńgesin qaıtaryp aldy

ASTANA. QazAqparat – 31 qazan men 4 qarasha aralyǵynda quqyǵy buzylǵan satyp alýshylarǵa jalpy somasy 36 mln teńge qaıtaryldy. Bul týraly QazAqparat tilshisi Saýda jáne ıntegratsııa mınıstrliginiń Tutynýshylardyń quqyǵyn qorǵaý komıtetine silteme jasap habarlaıdy.

5 kún ishinde komıtet pen onyń óńirlik departamentterine tutynýshylar tarapynan 608 ótinish túsken.

«331 tutynýshyǵa (ótinishterdiń 54%) quqyqtyq kómek kórsetildi, 274 shaǵym (45%) qanaǵattandyryldy, 87 ótinish quzyretine sáıkes memlekettik organdarǵa jiberildi. Sondaı-aq bir aptanyń ishinde sotqa 1 talap qoıyldy, 1 eskertý shyǵaryldy. Al 4 jaǵdaı tatýlasýmen sheshildi», - delingen komıtet taratqan habarlamada.

Quzyrly organ dereginshe, elordalyq turǵyn salynǵan sapasyz baspanaǵa qatysty shaǵym túsirgen. Keıin tutynýshy talabyna saı tıisti departament sotqa shaǵym joldaǵan. Nátıjesinde turǵyn úıdi salý barysynda kemshilik jibergen merdiger olqylyqtardy joıǵan. Vedomstvo dereginshe, shyǵyn somasy 10 mln teńgege baǵalanǵan.

Sonymen qatar Batys Qazaqstan oblysy turǵynnyń shaǵymynan keıin oǵan 18 mln teńgeden astam qarajat qaıtarylǵan.

«Avtosalon er azamatqa 18 mln teńgeden astam somaǵa sapasyz avtokólik satqan. Sonymen qatar olar klıentke 300 myń teńgege qosymsha jabdyq satyp alý talabyn qoıǵan. Ol aýmaqtyq departamentke shaǵym túsirgennen keıin avtokóligi tıisti sapadaǵy kólikke aýystyryldy, qosymsha jabdyq úshin tólengen barlyq qarajat qaıtaryldy», - dep málim etti komıtetten.

Budan ózge, Aqmola, Mańǵystaý jáne Shyǵys Qazaqstan oblystarynyń turǵyndary «Wildberries» ınternet-dúkeninen sapasyz taýarlar alyp, ony keri qaıtara almaǵan. Bul iske Tutynýshylardyń quqyǵyn qorǵaý komıteti aralasyp, keıin turǵyndarǵa jalpy somasy 330 myń teńgeden astam shyǵyny ótelgen.