Sapasyz munaı ónimin satqandarǵa jaýapkershilikti kúsheıtý qajet - A. Mılıýtın
ASTANA. 5 naýryz. QazAqparat - Sapasyz nemese sertıfıkatsyz munaı ónimderin satqandarǵa zań arqyly jaýapkershilikti qataıtý kerek.
Búgin Májiliste «Іshki naryqty munaımen jáne munaı ónimderimen qamtamasyz etý» jáne «Qarashyǵanaq jobasynyń úlesin memlekettiń satyp alýy» taqyryptaryndaǵy Úkimet saǵaty barysynda depýtat Aleksandr Mılıýtın osylaı málim etti.
Depýtattyń aıtýynsha, sheshimin tabýdy qajet etetin taǵy bir másele elimizdiń kóptegen janarmaı stansalaryndaǵy benzın sapasyna qatysty bolyp otyr. «Munaı ónimderin bólshek saýdada satý barysynda ónimdi sertıfıkatsyz nemese jalǵan sertıfıkattar arqyly ótkizý de oryn alyp jatyr. Tipti keı jaǵdaıda sertıfıkat bola tura, benzın sapasy onymen múldem sáıkespeıtini aıqyn. Sonda jurt ne úshin maı quıý stansalaryna aqsha shyǵyndaıdy?», - deıdi A. Mılıýtın. Osyǵan oraı, depýtat Úkimetke birqatar usynystar jasady. «Birinshiden, qoldanystaǵy zańnamaǵa tehnıkalyq reglament talaptaryna sáıkes emes nemese munaı ónimderin sertıfıkatsyz satqany úshin jaýaptylyqty kúsheıtýge qatysty ózgerister engizý kerek. Ekinshiden, munaı ónimderiniń sapa standartyna sáıkestigine óndirý barysynda ǵana emes, olardy jappaı jáne bólshek saýdada satý barysynda da monıtorıng júrgizý», - dedi depýtat.
