Sapasyz ınternet: Operatorlarǵa 1,2 mlrd teńge aıyppul salyndy

ASTANA. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın sapasyz baılanys pen ınternet úshin operatorlar qomaqty somada aıyppul tólep jatqanyn aıtty, dep habarlaıdy QazAqparat tilshisi.

«Qazaqstanda 6 406 eldi meken bar, onyń 4 733-i, ıaǵnı 74 paıyzy keń jolaqty ınternetke qosylǵan. 1 628 eldi meken 4G-ge qosylǵan, al 3 105 -i 3G tehnologııasymen qamtamasyz etilgen. Barlyq eldi mekenderdiń 34 paıyzy ADSL tehnologııasymen, ıaǵnı mys symymen qosylǵan, sondaı-aq optıka júıesimen 26 paıyzy qamtamasyz etilip otyr. Sonymen qatar, turǵyndar sany 260 myńnan asatyn 1673 aýyl keń jolaqty uıaly baılanys ınternetpen qamtylmaǵan. Baılanys sapasyn kóterý maqsatynda biz jyl saıyn «bazalyq stantsııalardyń» sanyn kóbeıtip jatyrmyz. Búginde 43 myńdaı bazalyq stantsııa ornattyq. Demek, jyl saıyn 4 myń jańa stantsııaǵa iske qosylady», - dedi B. Mýsın Parlament Májilisindegi Úkimet saǵatynda.

Osy oraıda ol zańnamalyq ózgerister arqyly operatorlardy baılanys ınfraqurylymyna ınvestıtsııa salýǵa yntalandyrý tetikteri bekitilgenin aıtty.

«Atap aıtqanda, árbir baılanys tehnologııasy úshin eń tómengi sapa parametrleri belgilengen. Naqty aıtatyn bolsaq, 3G-ge sekýndyna 1 Mbıt, 4G-ge sekýndyna 5 Mbıt aıqyndaldy. Bul mehanızmge sáıkes, bekitilgen sapa kórsetkishterin birinshi ret buzǵany úshin aıyppul somasy 100 aılyq eseptik kórsetkishten 1000-ǵa kóterildi. Bul talap qaıta buzylsa, 200 AEK-ten 15 myńǵa deıin jetedi. Shynyn aıtý kerek, buryn aıyppul mólsheri az bolǵan. Sol sebepti operatorlarǵa, basty jaýapkershilikti almaı, jaı ǵana aıyppul tólep júre berý yǵaıly edi», - dedi vedomstvo basshysy.

Bul turǵyda ol aıyppul somasynyń ósýi operatorlardy óz ınfraqurylymyna jaýapkershilikpen qaraýǵa mindetteıtinin aıtty.

«Aıyppul mehanızmi bıýdjetke túsetin kiristi kóterdi. 2022 jyly barlyǵy 1051 tekserý júrgizilip, 1 mlrd 264 mln teńge somasyna aıyppul jazyldy. Buǵan qosa, aıyppul nátıjesinde operatorlar 700 den astam bazalyq stantsııa qosymsha ornatty», - dedi mınıstr.

Budan buryn habarlanǵandaı, jaqynda senator sapasyz ınternetke aıyppul somasyn ósirýdi usyndy.