Sapasyz benzın satqan JShS-ǵa iri kólemde aıyppul salyndy
ORAL. QazAqparat - Oral qalasy mamandandyrylǵan ákimshilik sotynyń qaýlysymen QR Ákimshilik quqyqbuzýshylyq kodeksi 462-baby 3-bóligine sáıkes «Oral-Termınal» JShS-yna 200 AEK kóleminde (424,2 myń teńge) aıyppul salyndy, dep habarlaıdy QazAqparat.
BQO tutynýshylar qorǵaý departamentiniń bólim basshysy Elmıra Qımatovanyń aıtýynsha, bıyl «Ýralsk AZS Servıs», «Azov» jáne «Oral-Termınal» JShS-larynyń janar-jaǵarmaı quıý stansalarynan benzın satyp alynyp, zerthanaǵa jiberildi. Saraptama qorytyndysy 6 synamanyń beseýi talapqa saı kelmeıtinin kórsetti. Soǵan baılanysty atalǵan seriktestikterge sol benzındi satylymnan alyp, ónimniń sapasyn aıǵaqtaıtyn qujattardy kórsetý jóninde uıǵarym berildi. «Azov» jáne «Ýralsk AZS Servıs» JShS sáıkestik sertıfıkaty men barlyq talapqa saı keletin benzın qujatyn berdi. Al «Oral-Termınal» JShS olaı jasaı alǵan joq. Bylaısha aıtqanda, olar AI-95-K4, AI-92-K4 markaly benzınniń ornyna K-2 markaly, ıaǵnı ekologııalyq synyby tómen benzınniń qujatyn berdi.
Sol sebepti QR Ákimshilik quqyqbuzýshylyq kodeksi 462-baby 3-bóligine sáıkes hattama toltyrylyp, sotqa berildi. Birinshi satydaǵy sot sheshimine rıza bolmaǵan «Oral-Termınal» JShS BQO sotynyń azamattyq jáne ákimshilik ister jónindegi apellıatsııalyq sot alqasyna júgindi, biraq atalǵan qaýly ózgerissiz qaldyryldy.
«Bul - ázirge kezdesip otyrǵan osyndaı birinshi jaǵdaı. Aldaǵy ýaqytta da tutynýshylar quqyǵyn qorǵaý maqsatynda túrli ónimder satyp alynyp, tekserilip otyrylatyn bolady», - dedi QazAqparat tilshisine tutynýshylar quqyǵyn qorǵaý bóliminiń basshysy E.Qımatova.
