Sapasyz azyq-túlik satatyn dúkenderdi birden jabý kerek - D.Nazarbaeva
ASTANA. QazAqparat - Sapasyz, tehnıkalyq reglamentterge saı kelmeıtin taýarlar anyqtalǵan bólshek saýdadaǵy dúkenderdi birden jabý, jumystaryn toqtatý kerek. Búgin Májiliste Ekonomıkalyq reforma jáne óńirlik damý komıtetiniń keńeıtilgen otyrysynda depýtat Darıǵa Nazarbaeva osyndaı usynys aıtty. Eske salaıyq, jıyn barysynda tutynýshy ónimderin tehnıkalyq retteý máseleleri talqylanǵan bolatyn.
«Shyndyǵynda, men bólshek saýda jelisindegi talaptardy qatańdata túsý kerek dep sanaımyn. Óıtkeni, dúkender sol taýarlardy ózderi satyp alady, ózderi ákeledi, sosyn ony jurtqa satady, endeshe ózderi sertıfıkattaryn tekserip, kerek bolsa zerthanalyq shyǵyndaryn da ózderi tóleýleri kerek. Bul salada básekege adal emes jetkizýshilerge de qatań sharalar qoldaný kerek sekildi», - dedi Májilis vıtse-spıkeri.
Sonymen birge D.Nazarbaeva jaýapty memlekettik organdarǵa qarata aıtqan sózinde sapasyz taýarlar saýdalanatyn dúkenderge de qatań shara qoldanýdyń qajettigin atap ótti.
«Eger dúken sórelerinde nashar sapadaǵy taýarlar anyqtalsa, dúkendi jabyńyzdar, jumysyn toqtatyńyzdar. Áıtpese, basqasha áser etý múmkin emes. Ókinishke qaraı, nátıjege jetý úshin de tek osyndaı qatań sharalar ǵana kómektesetindeı», - dedi D.Nazarbaeva.
