Sapasyz jol saldarynan búlingen kóliktiń ótemaqysyn qalaı alýǵa bolady
QARAǴANDY. KAZINFORM – Elimizde búlingen joldardyń saldarynan kólikterge zaqym kelý jaǵdaılary jıi bolmasa da kezdesip jatatyn jáıt. Soǵan qaramastan kóliginiń buzylǵany úshin júrgizýshilerdiń barlyǵy birdeı ótemaqy ala bermeıdi. Buǵan kóbine kóliginiń joldyń nasharlyǵynan buzylǵanyn rastaıtyn dálelderdi tolyq keltire almaıtyn, júrgizýshilerdiń ózderi kináli bolyp jatady.
Qazaqstandaǵy joldardyń jaı-kúıi barlyq jerde birdeı keremet deı almaımyz. Asfalty mújilip, oıdym-oıdym bolyp ketken, uzaq jóndelmegen soń tereń shuńqyrǵa aınalǵan, jańbyr jaýǵanda mı batpaq bolyp jatatyn jol bólikterine búginde kózimiz úırengen. Mundaı joldar kólikti múldem jaramsyz etpese de, zııan keltiretini anyq. Al ol zııandy kim óteıdi?
Jalpy alǵanda joldyń nasharlyǵy júrgizýshiniń ǵana máselesi emes. Joldyń sapasyna jaýap beretin mekeme bar. Endeshe joldyń sapasyna baılanysty týyndaıtyn máseleni sol mekememen zań aıasynda sheshý kerek.
-Qazaqstan Respýblıkasynyń «Jol júrisi týraly» Zańyna sáıkes, qozǵalysqa qatysýshylar qaýipsiz jaǵdaıdyń qamtamasyz etilýine jáne joldyń kemshilikteri saldarynan keltirilgen zııannyń ótelýine quqyly, - dep túsindiredi zańger Anna Latosh.
Onyń aıtýynsha, uqsas mindet «Avtomobıl joldary týraly» zań aıasynda ýákiletti organdar men uıymdarǵa da júktelgen, bul zań olardy jol sapasyn qamtamasyz etýge mindetteıdi.
Mundaǵy negizgi shart – sebep-saldar baılanysyn dáleldeý.
-ıAǵnı, kóliktiń zaqymdanýyna dál joldaǵy aqaý sebep bolǵanyn, al júrgizýshi tarapynan erejebuzýshylyq bolmaǵanyn rastaý qajet, – deıdi Anna Latosh.
Tájirıbede shyǵyndy óndirip alýǵa negiz bolatyn jaǵdaılar kóbine shuńqyrlar, oıyqtar, joldyń shógýi, ashyq qalǵan káriz qudyqtary, eskertý belgileriniń bolmaýy, sondaı-aq joldardyń ýaqytyly jóndelmeýi nemese tıisti deńgeıde kútip-ustalmaýy bolyp tabylady. Dálelder jetkilikti bolǵan jaǵdaıda, sottar ádette júrgizýshilerdiń múddesin qorǵaıdy.
- Negizgi dálelderge polıtsııa hattamasy, aqaýdyń fotobekitilimi, saraptamalyq qorytyndy jáne kýágerlerdiń aıǵaqtary jatady. Tipti beınetirkegish bolmasa da, barlyq qujat durys rásimdelse, ótemaqy alýǵa bolady, – deıdi zańger.
Sot tájirıbesinde júrgizýshilerdiń saraptama shyǵyndary men sot shyǵystaryn qosa alǵanda, zalaldy tolyq óndirip alǵan jaǵdaılar da bar. Sonymen qatar kerisinshe, júrgizýshi kináli bolǵan kezder de kezdesedi.
- Eger aqaýdyń naqty ólshemderi nemese oqıǵa orny tirkelmese, sot jol qyzmetteriniń kinásin anyqtaı almaıdy», – dep naqtylaıdy Anna Latosh.
Sondyqtan oqıǵa bolǵan sátten keıingi alǵashqy áreketter sheshýshi mánge ıe. Júrgizýshi polıtsııa shaqyryp, jol-kólik oqıǵasyn rásimdeýi tıis jáne hattamada jol jabynynyń barlyq aqaýlarynyń kórsetilýin baqylaý qajet.
Sonymen qatar foto jáne beınetúsirilim júrgizip, shuńqyrdyń ólshemin, jol belgileriniń joqtyǵyn jáne basqa da mán-jaılardy tirkeý mańyzdy.
Kelesi kezeńde protsessýaldyq qujattardy – JKO syzbasyn, anyqtamany jáne hattamany alyp, táýelsiz shyǵyn baǵalaýyn júrgizý qajet.
- Saraptamalyq qorytyndy keltirilgen zııannyń mólsherin rastaıdy jáne ol sotta paıdalanylady, – dep túsindiredi zańger.
Odan keıin jaýapty tulǵa anyqtalady – ádette bul ákimdik, avtomobıl joldary basqarmasy nemese merdiger uıym bolady. Sotqa júginer aldynda 15 kúntizbelik kúnge deıin qaralatyn sotqa deıingi talap-aryz joldaý usynylady.
Bas tartylǵan nemese jaýap bolmaǵan jaǵdaıda júrgizýshi sotqa júginýge quqyly. Sondaı-aq ótinishterdi ákimdikterge, salalyq vedomstvolarǵa, polıtsııaǵa nemese elektrondyq úkimet portaly arqyly joldaýǵa bolady. Quzyrly organdar tarapynan eshqandaı áreket bolmasa – prokýratýra organdaryna shaǵymdanýǵa bolady.
Tájirıbe kórsetkendeı, ótemaqy alý múmkindigi kóliktiń zaqymdaný faktisine ǵana emes, eń aldymen JKO-nyń alǵashqy mınýttarynan bastap dálelderdiń qanshalyqty saýatty jınalyp, qujattardyń durys rásimdelýine tikeleı baılanysty.
Buǵan deıin Qazaqstan Respýblıkasynyń Premer-mınıstri Oljas Bektenov Úkimet otyrysynda joldardyń múshkil jaǵdaıyna qatysty azamattar shaǵymy azaımaı turǵanyn tilge tıek etken bolatyn.
