Sapasyz qurylysqa jol joq: Qazaqstanda merdigerlerdi baqylaý kúsheıedi
ASTANA. KAZINFORM — Qazaqstanda qurylys nysandarynyń sapasyna baqylaý kúsheıtiledi. Memlekettik sáýlet-qurylys baqylaýy qatańdatylyp, mindetin tıisti deńgeıde oryndamaıtyn merdigerlerge jaýapkershilik sharalaryn kúsheıtý kózdelip otyr. Bul týraly Úkimette ótken keńeste aıtyldy.
Prezıdenttiń joǵary sapaly qurylysty qamtamasyz etý salasyndaǵy tapsyrmalaryn oryndaý jónindegi sharalar týraly ónerkásip jáne qurylys mınıstri Ersaıyn Naǵaspaev baıandady.
Áleýmettik ınfraqurylymnyń aýqymdy qurylysy aýmaqtardy keshendi damytý qaǵıdaty negizinde júzege asyrylatyn bolady. Buzýshylyqtardyń erte satysynda aldyn alýǵa basa nazar aýdara otyryp, memlekettik sáýlet-qurylys baqylaýy kúsheıtildi. Jyl basynan josparlaý, jobalaý jáne qurylys protsesterine tsıfrlyq súıemeldeýdi qamtamasyz etetin biryńǵaı qurylys portaly qoldanysqa engizildi. Jobalardy saraptaý satysynda JI quraldaryn engizý boıynsha jumys júrgizilýde.
Elordadaǵy Ýrbanıstıka ortalyǵynyń tájirıbesin basqa óńirlerde keńeıtý aıasynda barlyq oblysta ýrbanıstıka salasynda salalyq uıymdar qurylyp, jumys istep jatyr. Ákimdikter 2026-2027 jyldarǵa arnalǵan qalalyq keńistikti damytýǵa zamanaýı tásilderdi engizýdi, qolaıly orta qurýdy jáne qalalardyń kelbetin jaqsartýdy kózdeıtin jol kartalaryn bekitti. Sonymen qatar jańa Qurylys kodeksinde eldi mekenderdiń sáýlettik kelbetin qalyptastyrýdyń mindetti quraly retinde dızaın-kod bekitildi.
— Memleket basshysy Qazaqstannyń úlken qurylys alańyna, jasampazdyq mekenine aınalýy qajettigin jáne qurylystyń joǵary sapasyn qamtamasyz etý kerektigin erekshe atap ótti. Osyǵan baılanysty Úkimet qurylysty qatań baqylaýdy qamtamasyz etýi kerek. Mindetin adal atqarmaıtyn merdigerlerge qatysty qatań jaýapkershilik sharalaryn qoldanýdy tapsyramyn, — dep atap ótti Oljas Bektenov.
Ónerkásip mınıstrligi óńir ákimderimen birlesip, árbir qurylys nysanyna qatań baqylaý men monıtorıng júrgizýdi, jobalyq standarttardy talap etýdi, ınfraqurylymdyq jáne áleýmettik nysandar qurylysynyń joǵary sapasyn qamtamasyz etýge tıis. Ýrbanıstıka ortalyǵynyń tájirıbesin keńeıtý jumystaryn uıymdastyrý boıynsha tapsyrmalar berildi.
— Atalǵan ortalyq qala turǵyndaryna qolaıly orta qurý úshin naqty usynystar ázirleıtin, qalanyń kelbetin jaqsartýǵa arnalǵan utymdy sheshimder men jobalardy, qala keńistigin damytýda zamanaýı tásilderdi daıyndaıtyn mańyzdy qurylym bolyp tabylady, — dep atap ótti Premer-mınıstr.
Eske sala keteıik, endi qurylys kompanııasy nysanǵa keminde bes jyl kepildik berýge mindetti.
