Sapasyz kosmetologııalyq qyzmet: salon qostanaılyqqa 1,2 mln teńge qaıtardy
ASTANA. KAZINFORM — Qostanaıda lıtsenzııasyz dermatokosmetologııalyq qyzmet úshin salon ákimshilik jaýapqa tartyldy, dep habarlaıdy Saýda jáne ıntegratsııa mınıstrliginiń baspasóz qyzmeti.
2025 jyldyń jazynda Qostanaı qalasynyń turǵyny konsýltatıvtik-dıagnostıkalyq jáne dermatokosmetologııalyq qyzmet úshin salonǵa 1 200 000 teńge tólegen. Alaıda ýáde etilgen nátıjeni kórmegendikten salon ákimshiligine kelisimdi buzý jáne aqshany tolyq qaıtarý týraly talap qoıǵan.
Salon bul talap aryzǵa jaýap bermegen, sondyqtan áıel Tutynýshylar quqyǵyn qorǵaý jáne saýda departamentine júgindi. Departamenttiń tekserisi salonnyń talap aryzǵa jaýap bermegenin anyqtap, ony ákimshilik jaýapkershilikke tartty.
Sonymen qatar kelisimshartqa tutynýshylardyń quqyqtaryn shekteıtin sharttardy, onyń ishinde aqshany qaıtarmaý týraly erejeni alyp tastaý jóninde nusqama berildi.
Tutynýshyǵa sotqa júginý usynyldy. Sot barysynda salonnyń dermatokosmetologııalyq protsedýralardy lıtsenzııasyz ótkizgeni anyqtaldy, sebebi bul qyzmetter medıtsınalyq qyzmetter qataryna jatady. Sot salondy tutynýshyǵa barlyq tólengen somany qaıtarýǵa mindettedi.
— Bul jaǵdaı kásipkerdiń zań talaptaryn oryndaýy mindetti ekenin, al tutynýshy sapaly ári qaýipsiz qyzmet alý quqyǵyna ıe ekenin taǵy bir ret kórsetedi. Departament óńir turǵyndarynyń quqyqtaryn turaqty qorǵaıdy jáne baqylaýdy kúsheıtedi, — dedi Qostanaı oblysy boıynsha saýda jáne tutynýshylar quqyǵyn qorǵaý departamenti basshysyniń mindetin atqarýshy K. Akıjanov.
Aıta keteıik, bıylǵy jyldyń basynan bastap departamentke 1452 ótinish tústi. Onyń 717-si jazbasha, 106-sy Telegram-bot arqyly, 269-y «jyldam jelige» telefon arqyly kelgen. Al 360 azamat jeke qabyldaýda mamandardan keńes aldy. Tutynýshylarǵa 62,7 mln teńgeden astam qarajat qaıtaryldy. Memlekettik baqylaý aıasynda 73 tekserý júrgizildi. Jospardan tys tekserýler nátıjesinde 16 kásipkerge eskertý berilip, 44 kásipkerge jalpy somasy 1 397 000 teńge aıyppul salyndy.
Budan buryn astanalyq kosmetolog lıtsenzııasyz jumys istep, densaýlyqqa zııan keltirgeni úshin sottalǵany belgili boldy.