Sapasyz bilim: keıingi bes jylda 16 JOO jabyldy
ASTANA. KAZINFORM — Birneshe jyl buryn jekemenshik joǵary oqý oryndaryndaǵy bilim sapasyna qatysty biraz syn aıtylǵan edi. Bul turǵyda ol JOO-larda qandaı kemshilikter anyqtaldy? Bul suraqqa Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti jaýap berdi.
- Memleket basshysynyń 2019 jylǵy 2 qyrkúıektegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda sapasyz bilim beretin joǵary oqý oryndarynyń qyzmetin qysqartý boıynsha bergen tapsyrmasyn oryndaý aıasynda sońǵy bes jylda sapasyz bilim beretin joǵary oqý oryndarynyń sany 16-ǵa qysqardy, sondaı-aq 66 JOO daıyndyqtyń beıindi emes baǵyttary boıynsha lıtsenzııaǵa qosymshalardy keri qaıtardy, - delingen vedomstvonyń Kazinform agenttigine bergen jaýabynda.
Komıtet aqparatyna qaraǵanda, JOO-ny jabý týraly sot sheshimderiniń qabyldanýyna qaraı Mınıstrlik prokýratýra, ákimdikter, sondaı-aq basqa da JOO rektorlarymen birlesip jumys toptaryn qurdy. Jumys toby bilim alýshylardyń múddelerin qorǵaý jáne qoǵamda áleýmettik shıelenisti boldyrmaý maqsatynda bilim alýshylardy oqýyn jalǵastyrý úshin basqa JOO-larǵa aýystyrý jáne professor-oqytýshylar quramyn jumysqa ornalastyrý boıynsha sharalar qabyldady.
Atap aıtqanda, 2024 jyly Mınıstrlik JOO-larda ǵylym jáne joǵary bilim salasyndaǵy zańnamasynyń saqtalýyna 27 memlekettik baqylaý sharalaryn júrgizdi. Júrgizilgen memlekettik baqylaý sharalarynyń nátıjeleri boıynsha JOO-larǵa qatysty anyqtalǵan kemshilikterdi joıý týraly uıǵarymdar shyǵarylyp, lıtsenzııanyń qoldanylýyn toqtata turý jáne aıyppul salý túrindegi ákimshilik jaýapqa tartyldy. Sondaı-aq, kadrlardy daıarlaýdyń tıisti baǵyttary boıynsha lıtsenzııalarǵa qosymshalar keri qaıtaryldy.
- 2025 jyly Aqtóbe qalasyndaǵy Qazaq-orys Halyqaralyq ýnıversıtetiniń qyzmeti toqtatyldy. 2025 jylǵy naýryzda stýdentterdi jappaı oqýdan shyǵarýǵa qatysty BAQ-ta jarııalanǵannan keıin, Mınıstrlik jospardan tys tekserý júrgizdi. Onyń nátıjeleri boıynsha biliktilik talaptaryn, JOO qyzmetiniń úlgilik qaǵıdalaryn, qabyldaý qaǵıdalaryn jáne memlekettik bilim berý standarttaryn saqtamaýdy qosa alǵanda, 22 tarmaq boıynsha óreskel zań buzý derekteri anyqtaldy. Byltyr 25 sáýirde Mınıstrlik bul JOO-ǵa qatysty aıyppul salý jáne ýnıversıtettiń bas lıtsenzııasynan aıyrý týraly sheshim qabyldandy. JOO Lıtsenzııalardyń memlekettik tiziliminen túpkilikti alynyp tastalyp, 2025 jyldyń túlekteri oqýyn aıaqtap, Qazaq-Orys Halyqaralyq ýnıversıtetiniń dıplomyn aldy. Qalǵan stýdentter batys óńiriniń akkredıttelgen joǵary oqý oryndaryna aýystyryldy. Osylaısha, sapasyz bilim beretin JOO-larǵa qatysty lıtsenzııadan aıyrýǵa deıin sharalardy qabyldaı otyryp, bilim berý qyzmetteriniń sapasyn qamtamasyz etý jónindegi jumys úzdiksiz sıpatqa ıe jáne ony Mınıstrlik birneshe júıeli negizde júrgizetin bolady, - dep atalyp ótken vedomstvo aqparatynda.
Aıta keteıik, Úkimettiń bıylǵy alǵashqy otyrysynda Premer-mınıstr Oljas Bektenov jekemenshik mektepter men medıtsınalyq uıymdardy sýbsıdııalaýda alaıaqtyq keńinen taraǵanyn málim etti.