Sapasyz bilim beretin JOO-lardy qysqartý jalǵasady — mınıstrlik
ASTANA. KAZINFORM — Ǵylym jáne joǵary bilim mınıstrligi jekemenshik joǵary oqý oryndaryndaǵy bilim sapasyna qatysty kemshilikter anyqtalǵanyn málim etti.
— Mınıstrlik sapasyz bilim beretin joǵary oqý oryndaryn qysqartý boıynsha jumysty jalǵastyryp jatyr. Jalpy, baqylaý sharalarynan profılaktıkalyq sharalarǵa nazar aýdarylyp otyr. Bul óz kezeginde Memleket basshysynyń 2020 jylǵy qyrkúıektegi Qazaqstan halqyna Joldaýynda bergen tapsyrmasyn oryndaý aıasynda «taza paraqtan» jańa retteýshilik saıasatynyń tásilderine sáıkes keledi. Tekserýden profılaktıkalyq sharalarǵa ótý, táýekelderdi basqarý jáne baǵalaý júıesin avtomattandyrý, tekserýler úshin joǵary oqý oryndarynyń tizimi men kestesin adamnyń qatysýynsyz qalyptastyrý — mınıstrlikke 2024 jyldan bastap tek problemalyq joǵary oqý oryndaryna nazar aýdarýǵa múmkindik beredi, — delingen Ǵylym mınıstrliginiń Kazinform agenttigine bergen jaýabynda.
Bul turǵyda Memleket basshysynyń tapsyrmasy boıynsha iske asyrylǵan «taza paraqtan retteý» saıasaty aıasynda «Smart Data Ukimet» aqparattyq júıesinde avtomatty rejımde qalyptastyrylǵan memlekettik baqylaý tiziminde 13 joǵary oqý ornyna qatysty memlekettik baqylaý ótkizildi. Sonyń nátıjesinde bilim berý qyzmetinde talaptardy buzý derekteri anyqtaldy.
— Bilim berý salasyndaǵy zańnamany buzǵany úshin JOO-larǵa qatysty kadrlardy daıarlaýdyń 16 baǵyty boıynsha lıtsenzııaǵa qosymshalardan aıyra otyryp, ákimshilik aıyppul túrinde ákimshilik jazalaý sharalary qabyldandy, — dep naqtylady vedomstvo.
Eske salsaq, birneshe jyl buryn Memleket basshysynyń tapsyrmasy aıasynda mınıstrlik sapasyz bilim beretin joǵary oqý oryndarynyń qyzmetin toqtatý boıynsha jumysty bastady.