Sapasyz benzınnen zardap shekken azamattardy qorǵaý tetigin qalyptastyrý kerek — Rahymjanov
ASTANA. KAZINFORM — Janarmaı sapasy boıynsha ashyq memlekettik tizilim qurý qajet. Bul týraly Quryltaı otyrysynda Premer-mınıstrge saýal joldaǵan depýtat Ashat Rahymjanov aıtty.
— Sońǵy ýaqytta aqparat keńistigi AI-95 jáne AI-98 markaly avtomobıl benzıni sapasynyń kúrt tómendeýine baılanysty azamattardyń jappaı shaǵymdary kóbeıip ketti. Janarmaı quıǵannan keıin kólikter turaqsyz jumys isteı bastaıdy: forsýnkalar, otaldyrý bilteleri, katalızatorlar jáne basqa da qymbat toraptar isten shyǵady. Jekelegen jaǵdaıda kólik ıeleri jóndeý jumystaryna 200-den 600 myń teńgege deıin qarjy jumsaýǵa májbúr. Kóptegen otbasy úshin bul — otbasy bıýdjetine aıtarlyqtaı salmaq, — dedi ol.
Depýtat Tehnıkalyq retteý jáne metrologııa komıteti 2026 jyly júrgizilgen baqylaý satyp alýlary barysynda benzındi tikeleı almastyrý faktileri anyqtalǵanyn málim etkenin eske saldy.
— Almatyda AI-100 benzıni retinde quramyndaǵy kúkirt mólsheri normadan úsh eseden astam joǵary ónim, al Qyzylorda oblysynda AI-95 markasynyń ornyna kádimgi AI-92 benzıni satylǵan. Bul jekelegen mysaldar emes. Tekserý qorytyndylary boıynsha sapasyz janar-jaǵarmaı materıaldarynyń úlesi áli de eleýli deńgeıde qalyp otyr, — dedi Ashat Rahymjanov.
Osyǵan oraı Quryltaı depýtaty mynadaı usynystar berdi:
— munaı ónimderiniń sapasyna memlekettik baqylaýdy kúsheıtý, onyń ishinde janarmaı quıý stantsııalary men munaı bazalarynan aldyn ala eskertýsiz, kútpegen jerden synama alýǵa quqyq berý, sondaı-aq mindetti zerthanalyq saraptamamen qatar júretin turaqty baqylaý satyp alýlaryn júrgizý;
— tek sońǵy satýshyny jazalaýmen shektelmeı, jetkizý tizbegindegi naqty kináli býynnyń jeke jaýapkershiligin belgileý;
— ÁQBtK-niń 281-baby boıynsha quqyq qoldaný tájirıbesin taldap, kondıtsııaǵa saı kelmeıtin otyndy ótkizý jáne aınalymǵa shyǵarý úshin jaýapkershilikti mólsherles túrde kúsheıtý, onyń ishinde mundaı partııalardy aınalymnan mindetti túrde alyp qoıýdy qarastyrý;
— tekserýlerdiń nátıjeleri kórsetiletin janarmaı sapasy boıynsha ashyq memlekettik tizilim qurý;
— zardap shekken azamattardy qorǵaýdyń naqty tetigin qalyptastyrý: sebep-saldarǵa baılanysty dáleldeýdi jeńildetý jáne dıagnostıka men jóndeý shyǵyndaryn óteý múmkindigin qarastyrý, keıinnen bul somalardy jetkizý tizbegindegi kináli qatysýshydan óndirip alý.
Buǵan deıin Saýda jáne ıntegratsııa mınıstrligi azamattardan kelip túsken ótinishterge baılanysty avtomobıl benzıniniń sapasyna zerthanalyq zertteýdi jalǵastyryp jatqanyn jazǵan edik.
