Sapasyz avtokólikti qaıtarýdan bas tartqan satýshy ákimshilik jaýapkershilikke tartyldy
ASTANA. KAZINFORM — Atyraý oblysynda satýshy tutynýshynyń sapasyz avtokólikti qaıtarý týraly talabyn oryndamaǵany úshin ákimshilik jaýapkershilikke tartyldy.
Tutynýshy EXEED VX avtokóligin 2023 jylǵy 4 mamyrda satyp alý-satý sharty boıynsha alyp, 10 mamyrda, onyń ishinde Trade-in baǵdarlamasy aıasynda tolyq tólem jasaǵan. Alaıda avtosalonnan shyqqan boıda kólikte eleýli aqaý anyqtalyp, qozǵalys kezinde avtomobıldiń aıtarlyqtaı ońǵa tartatyny belgili bolǵan.
2023 jylǵy 15 mamyrda tutynýshy bul aqaý jóninde satýshyǵa jazbasha túrde habarlaǵan. Satýshy birneshe márte dıagnostıkalyq tekserý júrgizgenimen, aqaýdyń sebebin anyqtamaǵan. Sonymen birge, tehnıkalyq kúrdeli taýarda mańyzdy aqaý bolǵan jaǵdaıda kózdelgen zańdy sharalardy qoldanbaǵan, kólikti aıyrbastaý nemese aqshany qaıtarý jóninde usynys jasamaǵan.
Sondaı-aq aqaýdyń tutynýshynyń paıdalaný erejelerin buzýynan týyndaǵanyn dáleldeı almaǵan.
Nátıjesinde tutynýshy satyp alý-satý shartyn buzýdy jáne tólengen qarajatty qaıtarýdy talap etken. Alaıda satýshy bul talaptardy oryndamaǵan. Bul «Tutynýshylar quqyqtaryn qorǵaý týraly» zańnyń 30-babynyń 2-1-tarmaǵy men 42-4-baby talaptarynyń buzylýyna ákep soqqan.
- Aryz negizinde 2024 jylǵy 30 jeltoqsanda Atyraý oblysynyń Saýda jáne tutynýshylardyń quqyqtaryn qorǵaý departamenti jospardan tys tekserý júrgizip, zańnama talaptarynyń buzylǵanyn rastady. Tekserý barysynda satýshy tutynýshy talabyn tıisti túrde qaramaǵany jáne aqaýdyń týyndaýynda óz kinásiniń joqtyǵyn dáleldeı almaǵany anyqtalǵan.
Tekserý qorytyndysy boıynsha satýshy Ákimshilik quqyq buzýshylyqtar kodeksiniń 190-baby 5-tarmaǵynyń 3-tarmaqshasyna sáıkes ákimshilik jaýapkershilikke tartylyp, eskertý túrindegi jaza qoldanyldy. Sonymen qatar zańbuzýshylyqtardy joıý jóninde mindetti nusqama berildi, - dep jazdy departamentten.
Satýshy talaptardy óz erkimen oryndamaǵandyqtan, tutynýshy sotqa júgingen. 2025 jylǵy mamyrda sot talaptardyń bir bóligin qanaǵattandyryp, satýshyny avtokóliktiń quny retinde 21 940 000 teńgeni qaıtarýǵa, moraldyq zııan úshin 100 000 teńge tóleýge jáne 870 838 teńge aıyppul óndirýge mindettedi.
Atyraý oblysynyń Saýda jáne tutynýshylardyń quqyqtaryn qorǵaý departamenti sot protsesine úshinshi tulǵa retinde qatysyp, satýshynyń zań talaptaryn buzǵanyn dáleldedi.
Aıta keteıik, Oral turǵyny avtosalonnan 17,8 mln teńgege satyp alǵan avtokólik jaramsyz bolyp shyqty.