Saparov túrkistandyq dıqandardy maqta sharýashylyǵyn damytýǵa shaqyrdy
ASTANA. KAZINFORM — Aýyl sharýashylyǵy mınıstri Aıdarbek Saparov Túrkistan oblysyna jumys sapary barysynda óńirdegi ınvestıtsııalyq jobalardyń júzege asyrylý barysymen jáne agroónerkásiptik keshenderdiń jumysymen tanysty, dep habarlaıdy AShM baspasóz qyzmeti.
Mınıstr birqatar kásiporyndardy, onyń ishinde jylyna 6 myń tonna kókónis óndiretin zamanaýı «Adelıa ShQ» jylyjaı keshenin aralady. Jobanyń quny 5,1 mlrd teńgeni quraıdy. Keshen frantsýzdyq RISHEL kompanııasynyń avtomattandyrylǵan qondyrǵylarymen jabdyqtalǵan. Ónimder ishki jáne syrtqy naryqqa shyǵarylady. Aldaǵy 5 jylda oblysta sý únemdeý tehnologııasymen egistik alqaptaryn 216 myń gektarǵa deıin ulǵaıtý josparlanýda. Sýarý tehnologııalarynyń qoljetimdiligin arttyrý úshin jergilikti 3 kásiporyn iske qosyldy: «BNK Group», «Turan Sý».
Jyl saıyn jergilikti sharýalar 100 myń gektarǵa deıin maqta egip, osy jyly 300 myń tonnadan astam ónim alyndy. «Túrkistan maqta agroónerkásiptik kesheni» JShS jumys sapary barysynda Aıdarbek Saparov oblystyń maqta sharýashylyǵyndaǵy orasan zor áleýetine toqtalyp, sharýalardy maqta sharýashylyǵyn damytýǵa, ozyq tehnologııalardy qoldana otyryp maqtanyń elıtalyq sorttaryn ósirýge shaqyrdy.
— Maqta-toqyma klasterin qurý, onyń ishinde maqtanyń elıtalyq sorttaryn ósirý jáne shıkizatty tereń óńdeý jumystary aıasynda oblysta maqta ónimdiligin 2,5 esege arttyrýǵa múmkindik beretin joba júzege asyryldy. Quny — 141 mlrd teńge. 4 myń adam turaqty jumyspen qamtylatyn bolady, — delingen vedomstvo habarlamasynda.
Jalpy, oblysta maqta sharýashylyǵyn damytýda 2027 jylǵa deıin 9 maqta klasterin qurý kózdelgen. Jobany tolyq júzege asyrý nátıjesinde maqta baǵasyna táýeldilik tolyǵymen joıylady. «Jaısan» sharýa qojalyǵynda ótken sharýalarmen kezdesýde Aıdarbek Saparov sýdy únemdeıtin tehnologııaǵa kóshýdiń mańyzdylyǵyn aıtyp, bul baǵyttaǵy jumysty jandandyrýǵa shaqyrdy.
Buǵan deıin Aýyl sharýashylyǵy mınıstri Aıdarbek Saparov oblys ákimdikterinen egin, astyqqa qatysty derekterdiń durystyǵyn qamtamasyz etýdi jáne olardy statıstıkaǵa sáıkes keltirýdi tapsyrýdy suraǵany belgili boldy.
