Saparhan Omarov jaıylymdardy paıdalanýǵa qatysty túsinik berdi

NUR-SULTAN. QazAqparat – Búgin Jer reformasy jónindegi komıssııanyń birinshi otyrysynda Aýyl sharýashylyǵy mınıstri Saparhan Omarov jaıylymdardy paıdalanýǵa qatysty túsinik berdi, dep habarlaıdy QazAqparat tilshisi.

«Jergilikti halyqtyń muqtajdyqtaryn qanaǵattandyrý úshin jaıylymdar berý máselelerin sheshý maqsatynda «Jaıylymdar týraly» Qazaqstan Respýblıkasynyń Zańy qabyldandy, onyń aıasynda 2 jyldyq merzimge jaıylymdardy basqarý jónindegi josparlardy ázirlep, bekitý kózdeldi. Bul josparlar halyqtyń mal jaıýyn qamtamasyz etý úshin uıymdastyrylǵan sharýashylyqtardyń júktelmegen jaıylymdaryn qaıta bólýge baǵyttalǵan. Bul rette, jaıylymdardy berý men paıdalanýǵa baılanysty is-sharalardy júrgizý kezinde jarııalylyqty qamtamasyz etý úshin Jaıylymdardy basqarý men olardy paıdalaný josparyn ázirleýge jergilikti ózin-ózi basqarý organdaryn qatystyrý zańnama júzinde kózdeldi. Jergilikti ózin-ózi basqarý organdary jergilikti atqarýshy organdardyń jaıylymdardy paıdalaný jónindegi jyl saıynǵy esepterin tyńdap, talqylaıdy, jaıylymdardy qaıta bólý máselesin qaraýǵa, Jaıylymdardy basqarý josparyn iske asyrýǵa qatysady, sondaı-aq jaıylym paıdalanýshylarmen, jaıylym paıdalanýshylar birlestikterimen jaıylymdardy basqarý jáne paıdalaný máseleleri boıynsha ózara is-qımyl júrgizedi», - dedi mınıstr.

Osy oraıda ol 2015 jyldan bastap paıdalanylmaıtyn jerlerdiń anyqtalýyn memlekettik baqylaý fýnktsııalaryn jergilikti atqarýshy organdar júzege asyratynyn eske saldy.

Budan buryn habarlanǵandaı, Saparhan Omarov aýyl sharýashylyǵy jerlerin tıimdi jáne utymdy paıdalaný máseleleri boıynsha júrgizilip jatqan jumystar týraly baıandady.