Saparhan Omarov veterınarııalyq-sanıtarııalyq problemany aıtty

NUR-SULTAN. QazAqparat – Tekserýlerdi jáne baqylaýdyń profılaktıkalyq veterınarııalyq ári fıtosanıtarııalyq túrlerin moratorııden shyǵarý kerek. Bul týraly QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Veterınarııa jáne fıtosanıtarııa salasynda qabyldanyp jatqan sharalarmen qatar, ashyq túrde qalyp otyrǵan birqatar másele bar. Bul negizinen veterınarııalyq-sanıtarııalyq jáne fıtosanıtarııalyq baqylaý men qadaǵalaý júrgizýge baılanysty. Birinshiden, tekserýlerge moratorıı engizilýine baılanysty janýarlardyń asa qaýipti aýrýlarynyń, karantındik obektilerdiń jáne asa qaýipti zııandy organızmderdiń respýblıka aýmaǵynda paıda bolý ári taralý jaǵdaılarynyń aldyn alý men jolyn kesý máselesi óte mańyzdy bolyp tur. Bul jerde veterınarııalyq jáne karantındik ınspektorlar baqylaý obektilerine bara otyryp, tekserý jáne baqylaý júrgizýleri qajet», - dedi mınıstr Úkimet otyrysynda.

Osy oraıda S. Omarov baqylaý obektilerine bara otyryp, tekserýlerdi jáne baqylaý men qadaǵalaýdyń profılaktıkalyq veterınarııalyq ári fıtosanıtarııalyq túrlerin moratorııden shyǵarýdy usyndy.

Budan buryn habarlanǵandaı, 2020 jyldyń 9 aıy ishinde Qazaqstan Respýblıkasyna karantınge jatqyzylǵan ónimniń ımporty kezinde ósimdikter karantıni salasynda 3 082 ereje buzýshylyq anyqtaldy.

Sonymen qatar, Úkimet otyrysynda Premer-Mınıstr veterınarııa mamandyǵyna bilim granttaryn kóbeıtýdi tapsyrdy.