Saparhan Omarov Túrkııanyń agroónerkásip salasynyń ókilderimen kezdesti
Іs-sharaǵa Túrkııa Respýblıkasynyń Saýda-ónerkásip palatalary men taýar bırjalary odaǵynyń quramyna kiretin kompanııalardyń basshylary qatysty.
Kezdesý barysynda qazaqstandyq tarap otandyq AÓK damýynyń basym baǵyttaryn tanystyrdy. Atalmysh salaǵa memlekettik jaǵynan jasalyp jatqan qoldaý sharalary týraly keńinen aıtyp, elimizdiń agroónerkásip salasynyń ınvestıtsııalyq tartymdy tustaryn tilge tıek etti.
Aýyl sharýashylyǵy ónimderin ótkizýdiń negizgi álemdik naryqtaryna tikeleı qol jetkizýdi qamtamasyz etetin Qazaqstannyń tıimdi geografııalyq ornalasýy atap ótildi.
Kezdesý sońynda mınıstr túrik kásipkerlerin yntymaqtastyqqa jáne aýyl sharýashylyǵy men óńdeý salasyndaǵy birlesken jobalardy iske asyrýǵa shaqyrdy.
Sondaı-aq, Saparhan Omarov Túrkııa Respýblıkasynyń Aýyl jáne orman sharýashylyǵy mınıstri Bekır Pakdemırlımen kelissózder júrgizip, ekijaqty yntymaqtastyq jáne AÓK-degi Qazaqstan-Túrkııa ınvestıtsııalyq jobalaryn iske asyrý máseleleri talqylandy.
QR AShM basshysy túrik ınvestorlarynyń qatysýymen iske asyrylǵan AÓK-gi birqatar tabysty jobalar, sondaı-aq quny $500 mln quraıtyn 13 jańa ınvestıtsııalyq joba jaıly málim etti.
«Túrkııa bizdiń burynnan kele jatqan strategııalyq seriktesimiz. Biz aýyl sharýashylyǵy salasyndaǵy ekijaqty yntymaqtastyqty keńeıtýge jáne ózara tıimdi sharttarmen taýar aınalymynyń kólemin arttyrýǵa úlken mán beremiz. Eki el arasyndaǵy saýdany odan ári arttyrý óte joǵary áleýetke ıe», - dep atap ótti S.Omarov.
Kelissózder barysynda Saparhan Omarov «KazBeef» JShS jáne «Aqtóbe et klasteri» JShS kompanııalaryn aýyl sharýashylyǵy ónimderin senimdi eksporttaýshylar tizimine qosý máselesin qozǵap, Túrkııa aıtarlyqtaı tabystarǵa qol jetkizgen saýda-logıstıkalyq ınfraqurylymdy qurý, aýyl sharýashylyǵy shıkizatyn qaıta óńdeý, sapaly jáne qoljetimdi azyq-túlik ónimderin óndirý salasynda Qazaqstan yntymaqtastyqty damytýǵa múddeli ekenin bildirdi.
«Qazaqstan Túrkııanyń toqyma ónerkásibin, bylǵary men júndi óńdeýdi damytýdaǵy tájirıbesin joǵary baǵalaıdy. Qazaqstandyq tarap birlesken jobalardy iske asyrýǵa múddeli, óıtkeni elimizde shıkizattyń jetkilikti kólemi bar. Sondaı-aq, agrarlyq ǵylym salasynda birlesken zertteýler júrgizý úshin Túrik ǵylymı-zertteý uıymdarymen tyǵyz
yntymaqtastyq ornatqymyz keledi», - dedi Saparhan Omarov.
