Saparhan Omarov sheteldikterge jalǵa berilgen jer týraly aıtty

NUR-SULTAN. QazAqparat – Búgin Májilistiń jalpy otyrysynda Aýyl sharýashylyǵy mınıstri Saparhan Omarov jer qatynastary máseleleri týraly zań jobasyn talqylaý kezinde elimizde qansha jer alqaby sheteldikterge jalǵa berilgenin naqtylady, dep habarlaıdy QazAqparat tilshisi.

«Zań jobasyna sáıkes, 2016 jylǵy 1 shildege deıin, ıaǵnı moratorıı engizilgenge deıin berilgen aýyl sharýashylyǵy maqsatyndaǵy jer ýchaskelerine ýaqytsha jer paıdalaný quqyǵy sheteldik jer paıdalanýshylarǵa, sheteldik qatysý úlesi bar birlesken kásiporyndarǵa jáne qandastarǵa jaldaý merzimi aıaqtalǵanǵa deıin qoldanylady ári uzartylýǵa jatpaıdy. Osyndaı adamdardyń sany jáne olar ıelenetin aýyl sharýashylyǵy jerleriniń alańdary týraly derekter bar ma, sondaı-aq olardyń jaldaý merzimi qashan aıaqtalady», - dep surady depýtat Fahrıddın Qarataev.

Óz kezeginde Aýyl sharýashylyǵy mınıstri Saparhan Omarov mundaı jerler qazirgi kezde Qazaqstanda bar ekenin aıtty.

«Atap aıtqanda, 74,4 myń gektar aýyl sharýashylyǵy jeri 7 birikken kásiporynǵa jalǵa berilgen. Odan basqa eki sheteldik zańdy tulǵa 18,5 myń gektar jerdi búgingi kúni jalǵa alyp otyr. Bulardyń barlyǵy moratorıı engizilgenge deıingi alynǵan jerler. Olardyń jalǵa alý merzimi 2022 jyldan 2025 jylǵa deıin. Osy ýaqyt ótkennen keıin bul jerlerdiń barlyǵy memleketke qaıtarylady», - dedi S. Omarov.

Budan buryn habarlanǵandaı, búgin Parlament májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrý engizý týraly» zań jobasy birinshi oqylymda maquldandy.

Zań jobasymen aýyl sharýashylyǵy jerlerin sheteldikterge jáne sheteldik kompanııalarǵa, sheteldik úlesi bar qazaqstandyq kompanııalarǵa, azamattyǵy joq adamdarǵa, halyqaralyq qatysýy bar ǵylymı ortalyqtarǵa, sondaı-aq qandastarǵa berýge tolyq tyıym salý kózdelgen. Sonymen qatar, zań jobasynda budan buryn sheteldiktermen jáne sheteldik úlesi bar qazaqstandyq kompanııalarmen jalǵa alynǵan aýyl sharýashylyǵy jerleriniń paıdalaný merzimin uzartylmaıtyndyǵy jáne olardyń paıdalaný merzimi aıaqtalǵanǵa deıin ǵana ıelikte bolatyny qarastyrylǵan.

S. Omarovtyń aıtýynsha, qandastar boıynsha olar jeke qosalqy sharýshylyǵy, baý-baqsha jáne saıajaı qurylysy úshin jer ýchaskesin ala alady, aýyl sharýashylyǵy jerlerin Qazaqstan azamattyǵyn alǵannan keıin ǵana jalǵa alýǵa múmkindigi bar.