Saparhan Omarov saladaǵy sýbsıdııalaý týraly túsinik berdi
«Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasynyń iske asyrylýy, sondaı-aq ótken jyly qabyldanǵan daǵdarysqa qarsy sharalar koronavırýs pandemııasymen baılanysty kúrdeli jaǵdaılarda otandyq agroónerkásiptik keshenniń turaqty damýyn qamtamasyz etýge múmkindik berdi. Máselen, jalpy aýyl sharýashylyǵy óniminiń kólemi 5,7%-ǵa artyp, 6,3 trln teńgeni qurady. Bul – Eýrazııalyq ekonomıkalyq odaq elderi arasyndaǵy eń úlken ósim. Azyq-túlik óndirisi 4%-ǵa ósti», - dedi S. Omarov Senattaǵy Qazaqstannyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasyn iske asyrý taqyrybyndaǵy Úkimet saǵatynda.
Onyń aıtýynsha, aýyl sharýashylyǵynyń negizgi kapıtalyna salynatyn ınvestıtsııalar kólemi 15%-ǵa, tamaq ónimderi óndirisine quıylǵan ınvestıtsııalar kólemi 13,5%-ǵa ósti. Nátıjesinde, agroónerkásiptik keshenge salynǵan ınvestıtsııalardyń jalpy kólemi 677,2 mlrd teńgeni qurap, josparly mánnen 154,2 mlrd teńgege asyp tústi.
«Salanyń jyl saıyn tolyq qarjylandyrylmaýyna qaramastan, daǵdarysqa qarsy sharalardy eskere otyryp, ótken jyly sýbsıdııalaý kólemi 366 mlrd teńgege deıin jetkizildi, bul 2016 jylǵy deńgeıden 1,6 ese kóp. Bul rette sýbsıdııalaý barynsha jeńildetilip, tolyqtaı avtomattandyryldy, bul sýbsıdııa berý protsesiniń ashyqtyǵyn qamtamasyz etýge múmkindik beredi. Sýbsıdııalaýǵa qoıylatyn talaptarǵa ózgerister engizý arqyly shaǵyn jáne orta fermerlerdi sýbsıdııalaýmen qamtý aýqymy keńeıtildi», - dedi mınıstr.
Ósimdik sharýashylyǵyndaǵy barlyq sýbsıdııalar biryńǵaı qaǵıdalarǵa biriktirildi. Ósimdikterdi qorǵaý quraldaryn sýbsıdııalaý keńeıtildi. Endi gerbıtsıdter ǵana emes, pestıtsıdterdiń basqa da túrleri sýbsıdııalanady. Sýbsıdııalardy kúntizbelik jyl aıasynda emes, tuqym, tyńaıtqysh, pestıtsıd satyp alynǵan kúnnen bastap 12 aı ishinde alý múmkindigi basty jańalyqtardyń biri bolyp otyr.
Budan buryn habarlanǵandaı, QR Parlamenti Senaty tóraǵasynyń orynbasary Nurlan Ábdirov agrarlyq kesheniniń damýyna keri áserin tıgizgen faktorlardy atady.
Óz kezeginde senator Dúısenǵazy Mýsın birqatar azyq-túlik ónimderi boıynsha ımportqa táýeldilik saqtalyp turǵanyn, onyń kólemi ótken jyly 4 mlrd AQSh dollarynan asqanyn aıtty.