Saparhan Omarov: Óńirlerden kelgen utymdy usynystardy ulttyq joba tujyrymdamasyna engizemiz
Bul týraly QazAqparat QR Aýyl sharýashylyǵy mınıstrliginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, QR Aýyl sharýashylyǵy mınıstrligi fermerlermen, aýyl sharýashylyǵy máselelerine jetekshilik etetin respýblıkalyq mańyzy bar qalalar jáne oblys ákimderiniń orynbasalarymen, aýyl sharýashylyǵy basqarmalarynyń basshylarymen ótken keńeste AÓK damytý jónindegi ulttyq jobanyń Tujyrymdamasyn usyndy.
Keńes barysynda Aýyl sharýashylyǵy mınıstri Saparhan Omarov tujyrymdamany ázirleýge BUU Azyq-túlik jáne aýyl sharýashylyǵy uıymynyń sarapshylary, «Atameken» UKP, bıznes jáne ǵylymı qoǵamdastyq ókilderi qatysqanyn atap ótti.
Ulttyq joba tujyrymdamasynyń negizgi jańashyldyqtary týraly QR AShM vıtse-mınıstri Rústem Qurmanov aıtyp berdi.
Atap aıtqanda, ol qujat agroónerkásip keshenin (AÓK) damytýdyń 15 basym baǵytynan turatynyn, olardyń árqaısysy boıynsha naqty sharalar men ındıkatıvter kózdelgenin habarlady.
Saparhan Omarov keńeske qatysýshylardy qujatty talqylaýǵa shaqyra otyryp, Aýyl sharýashylyǵy mınıstrligi óńirlerdiń barlyq utymdy usynystaryn qaraýǵa jáne ulttyq joba tujyrymdamasyna engizýge daıyn ekenin aıtty.
«Aýyl sharýashylyǵy el ekonomıkasynyń basym baǵyttarynyń biri bolyp tabylatynyn eskere otyryp, aımaq ákimderiniń orynbasarlarynan óńirlerdiń ereksheligin eskere otyryp, AÓK salasyn damytý tetikterin ázirleý úshin óńirlik jumys toptaryn jedel qurýǵa shaqyramyn. Sonymen qatar, máselelerdi kórsetip qana qoımaı, olardy sheshý joldaryn da usynýdy suraımyn. Mınıstrliktiń qurylymdyq bólimsheleriniń basshylaryna kelip túsken barlyq usynystardy nazarǵa alýdy tapsyramyn», - dep atap ótti mınıstr.