Saparhan Omarov Qazaqstan bıyl qansha tonna astyq pen undy eksporttaıtynyn atady
«Búgingi kúni egin jınaý jumystary respýblıkanyń barlyq óńirlerinde júrgizilip jatyr. Bul rette Túrkistan oblysynda dándi daqyldardy jınaý aıaqtaldy (20,0 ts/gektar ortasha ónimdilik kezinde 462,0 myń tonna astyq bastyryldy), Jambyl oblysynda bitýge jaqyn. Jedel derekterge sáıkes, jalpy respýblıka boıynsha dándi daqyldardy jınaý alańy 15,2 mln gektardy quraıdy. Onyń 4,8 mln gektary jınalyp qoıdy», - dedi Saparhan Omarov Úkimet otyrysynda.
Mınıstrdiń baıandamasyna sensek, osy jylǵy egin jınaý jumystaryn bastaýǵa jalpy qolda bar tehnıkanyń 98 paıyzy daıyn. Egin jınaý jumystaryn júrgizý úshin 147 myń traktor, 82,3 myń traktor tirkemesi, 38,5 myń astyq jınaıtyn kombaın, 15,2 myń destelegish, 40,3 myń júk tasyǵysh avtokólik bar.
«Jumystyń toqtap qalmaý úshin aýyl sharýashylyǵy taýaryn óndirýshiler jóndeý brıgadalaryn qurdy. Servıstik kompanııalardyń qyzmetin kúsheıtý, qoımalardy qajetti qosalqy bólshektermen toltyrý boıynsha olarmen tıisti jumystar júrgizildi. Basty mindet – ónimdi ysyrapsyz jınaý bolǵandyqtan, ákimdikter atalǵan máseleni erekshe baqylaýda ustaýy qajet. Astyqty eksportqa shyǵarý boıynsha daıyndyq jumystary júrgizilýde. Ádette, astyq tasymaldaıtyn vagondar tapshylyǵyn baıqaıtynbyz. Bıyl basqa memlekettik organdarmen birlese otyryp aldyn ala logıstıka máselelerin sheshý boıynsha júıeli jumys júrgizdik. QTJ-men birlesip barlyq múddeli taraptardyń qatysýymen shuǵyl máselerdi sheshý jónindegi shtab quryldy. Satý naryqtary anyqtalǵan. 2019/2020 marketıngtik jylǵa arnalǵan astyq pen unnyń eksporttyq áleýeti 7 mln tonna shamasynda bolady», - dedi Saparhan Omarov.
Eske sala ketsek, búgingi Úkimet otyrysynda Premer-Mınıstr Asqar Mamın Aýyl sharýashylyǵy mınıstri men oblys ákimderine egin oraǵyn sapaly júrgizýdi mindettegen bolatyn.
Óz kezeginde Energetıka mınıstri Qanat Bozymbaev dıqandarǵa dızel qanshadan satylýy kerektigin aıtty.