Saparhan Omarov qandaı azyq-túlik túrleri ımportqa táýeldi ekenin aıtty
«Qazirgi ýaqytta sektorda Qazaqstannyń agroónerkásiptik kesheniniń damýyn tejep turǵan birqatar problema bar. Bular - aýyl sharýashylyǵy daqyldary túsiminiń jáne mal sharýashylyǵyndaǵy ónimdiliktiń tómendigi. Aýyl sharýashylyǵy eńbekkerleriniń 60 paıyzdan astamy mal sharýashylyǵymen emes, tek ósimdik sharýashylyǵymen aınalysady, tıisinshe olar halyqty jyl boıy jumyspen qamtı almaıdy. Aýyl sharýashylyǵy tehnıkasy men jabdyǵynyń tozý dárejesi 80 paıyzǵa jetedi», - dedi mınıstr.
Onyń atap ótýinshe, qazirgi ýaqytta Aýyl sharýashylyǵy mınıstrligi «Nur Otan» partııasynyń ishki naryqty otandyq ónimdermen molyqtyrý jónindegi saılaýaldy platformasyn eskere otyryp, Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyna ózgerister daıyndaǵan.
«Qazir bizdegi áleýmettik mańyzy bar taýarlar tizbesine 19 taýar engen. Olardyń ishinde 505 mln AQSh dollary somasyndaǵy tek 6 taýar boıynsha ǵana ımportqa táýeldimiz. Atap aıtqanda, 191,6 myń tonna nemese ishki tutynýdyń 49 paıyzy kólemindegi qus eti; shamamen 30 myń tonna nemese ımport úlesi 39 paıyz kólemindegi shujyq ónimderi; 21,9 myń tonna nemese jalpy tutynýdyń 46,5 paıyzy kólemindegi irimshik pen súzbe; 101 myń tonna nemese ımport úlesi 31,5 paıyz kólemindegi alma; shamamen 250 myń tonna nemese ımport úlesi 57,3 paıyz kólemindegi qant; 30,6 myń tonna nemese ımport úlesi 72 paıyz kólemindegi balyq», - dedi S.Omarov.
Odan bólek, mınıstr ımporttan qutylý joldaryn da aıtyp ótti.
«Jalpy alǵanda, ımport almastyrý mindeti orta merzimdi perspektıvada 2024 jylǵa deıin iske asyrylady. Ol boıynsha mınıstrliktiń naqty jospary bar. Mysaly, sút boıynsha jyl saıyn keminde 25 ónerkásiptik taýarlyq sút fermasyn paıdalanýǵa berý josparlanǵan. Qus etiniń ımportyn almastyrý úshin qýaty 200 myń tonnalyq qus fabrıkalaryn qosymsha paıdalanýǵa engizý qajet. Qazir bizde 155 myń tonna qus etine arnalǵan 12 joba jobalaý men iske asyrý satysynda tur», - dedi S.Omarov.
Onyń aıtýynsha, alma ımportyn almastyrý úshin qosymsha jyl saıyn 1 600 gektar alańda baqtar ósirý kerek. Olar 105 myń tonna alma óndirýge múmkindik beredi. 2020 jyly 1 655 gektarǵa arnalǵan daıyn jobalar bar. Qazir olar iske asyrylyp jatyr.
«Іshki naryqty qantpen molyqtyrý boıynsha jańa 2 zaýyt salý jáne jumys istep turǵan 3 qant zaýytyna jańǵyrtý júrgizý, sondaı-aq qant qyzylshasy egisterin ulǵaıtý qajet. Import almastyrý jónindegi bul sharalardyń iske asyrylýy 2024 jylǵa qaraı sektordyń negizgi kapıtalyna shamamen 770 mlrd teńge ınvestıtsııa tarta otyryp, ishki naryqty 80 jáne 100 paıyzǵa deıin otandyq ónimdermen molyqtyrýǵa múmkindik beredi. Sondyqtan, biz tıimsiz sýbsıdııalardan bas tartyp, nátıjege baǵdarlanǵan sýbsıdııalarǵa kóshý arqyly qoldanystaǵy memlekettik qoldaý sharalaryn jetildirýdi usynamyz», - dedi ol.