Saparhan Omarov astyq baǵasyn atady
ASTANA. QazAqparat - Búgin Úkimet úıindegi baspasóz máslıhatynda QR Aýyl sharýashylyǵy mınıstri Saparhan Omarov qazirgi ýaqyttaǵy astyq baǵasyn aıtty, dep habarlaıdy QazAqparat tilshisi.
"Keıingi ýaqytta aqparat quraldarynda astyq baǵasynyń kóterilýi, óńdeýshi kásiporyndardaǵy astyq tapshylyǵy oryn alyp otyrǵandyǵy, sonyń saldarynan nan baǵasynyń qymbattaýy jóninde kóptegen aqparat tarap jatyr. Ótken jyldyń sońynan osy jyldyń basyna deıin astyq baǵasynyń joǵarylaýy baıqaldy. Ony bárimiz bilemiz. Astyq baǵasy tonnasyna 75 myń teńgege deıin jetti. Bul Ortalyq Azııada, Iranda jáne álemdik naryqta astyq baǵasynyń joǵarylaýyna baılanysty boldy. Buǵan biz bir jaǵynan qýanýymyz kerek. Óıtkeni, bizdiń astyq óndirýshilerimiz astyǵyn joǵary baǵamen satyp, qaryzdarynan qutylyp, kóktemgi jumystardy ótkizýge qarajattaryn alyp otyr", - dedi mınıstr.
Degenmen, onyń aıtýynsha, sońǵy eki apta ishinde astyq baǵasy túse bastady. Búginde 1 tonna astyq baǵasy 64-67 myń teńge bolyp tur.
"Bul astyq sapasyna baılanysty. Qazirgi kezde mınıstrlikte astyqtyń satylý syzbasy elektrondy túrde júrgiziledi. Ol úshin astyq qolhattaryn ustaýshylar bar. Elektrondy saýda jasaý alańdary qurylǵan. Búginde Qazaqstandaǵy 100 paıyz astyq satý sharttary elektrondy alańda júrgiziledi", - dedi S.Omarov.
