Saparhan Omarov almamen qamtamasyz etýdiń jobasy jaıynda aıtty
«Azyq-túlik taýarlaryn óndirýdiń qosymsha kólemderiniń ósýin qamtamasyz etý úshin jyl sońyna deıin birqatar jańa ınvestıtsııalyq jobalar engiziledi. Mysaly, jyl sońyna deıin qus etin óndirý kólemi 75 myń tonnaǵa nemese 25 paıyzǵa ulǵaıtylady. Bul jańa 8 qus fabrıkasyn jyldyń aıaǵyna deıin iske qosý esebinen qamtamasyz etiledi. Olardyń ekeýi iske qosyldy», - dedi mınıstr Úkimet otyrysynda.
Sonymen qatar, ol sút óndirisi ulǵaıtylatynyn jetkizdi. Jyldyń sońyna deıin qosymsha kólemi 112 myń tonna bolatyn 25 ónerkásiptik taýarlyq sút fermasy iske qosylady. 6 ınvestıtsııalyq joba júzege asyryldy. Jyl sońyna deıin qýattylyǵy 45 myń tonna bolatyn 3 jańa et kombınatyn iske qosý josparlanyp otyr.
«Halyqty almamen qamtamasyz etý úshin 2 myń gektar qarqyndy alma baǵyn otyrǵyzý josparlanýda, olar 68 myń tonnaǵa deıin ónim bere alady. 1700 gektar qazirdiń ózinde otyrǵyzyldy. Qant óndirý boıynsha Jambyl oblysynda jańa zaýyt salý boıynsha jumystar bastaldy. Qant qyzylshasyna arnalǵan alańdar 20,5 myń gektarǵa deıin ulǵaıtyldy, Almaty oblysynda qoldanystaǵy qant zaýyttaryn jańǵyrtý júrgizilýde», - dedi S. Omarov.