Saparhan Omarov alma ımportyn almastyrýdyń joldaryn aıtty
«Sút boıynsha jyl saıyn keminde 25 ónerkásiptik taýarlyq sút fermasyn paıdalanýǵa engizý jospary bar. Qus etiniń ımportyn almastyrý úshin qýaty 200 myń tonnalyq qus fabrıkalaryn qosymsha paıdalanýǵa engizý qajet. Qazir bizde 155 myń tonna qus etine arnalǵan 12 joba jobalaý men iske asyrý satysynda tur. Alma ımportyn almastyrý úshin bizge qosymsha 12,5 myń gektar alańda baq ósirý kerek, olar 105 myń tonna alma óndirýge múmkindik beredi», - dep toqtaldy mınıstr.
Onyń sózine qaraǵanda, ishki naryqty qantpen molyqtyrý boıynsha jańa 2 zaýyt salý jáne jumys istep turǵan 3 qant zaýytyna jańǵyrtý júrgizý, sondaı-aq qant qyzylshasy egisterin ulǵaıtý qajet.
«Import almastyrý jónindegi bul sharalardyń iske asyrylýy 2024 jylǵa qaraı sektordyń negizgi kapıtalyna shamamen 770 mlrd teńge ınvestıtsııa tarta otyryp, ishki naryqty 80 jáne 100 paıyzǵa deıin otandyq ónimdermen molyqtyrýǵa múmkindik beredi. Sondyqtan, biz tıimsiz sýbsıdııalardan bas tartyp, nátıjege baǵdarlanǵan sýbsıdııalarǵa kóshý arqyly qoldanystaǵy memlekettik qoldaý sharalaryn jetildirýdi usynamyz», - dedi Saparhan Omarov.
Budan buryn habarlanǵandaı, mınıstr Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyna ózgerister daıyndalǵanyn aıtty.
«Búginde bizdegi áleýmettik mańyzy bar taýarlar tizbesine 19 taýar engen, olardyń ishinde 505 mln AQSh dollary somasyndaǵy tek 6 taýar boıynsha ǵana ımportqa táýeldimiz», - dedi S. Omarov.