Saparhan Omarov Aqmola oblysynyń kóktemgi egiske daıyndyǵyn tekserdi

KÓKShETAÝ. QazAqparat - QR Aýyl sharýashylyǵy mınıstri Saparhan Omarov jumys saparymen Aqmola oblysynda bolyp, aýylsharýashylyq taýarlaryn óndirýshilerdiń blokpostardan kedergisiz ótýin, aımaqtyń kóktemgi egis jumystaryna daıyndyǵyn pysyqtady. QazAqparat bul týraly mınıstrliktiń baspasóz qyzmetine silteme jasap habarlaıdy.

Oblys ákimi Ermek Marjyqpaevtyń aıtýynsha, aýylsharýashylyq tehnıkasynyń úzdiksiz qozǵalysyn qamtamasyz etý, sondaı-aq tuqymdy, janar-jaǵarmaı men qosalqy bólshekterdi jetkizý úshin oblysta arnaıy «qozǵalys algorıtmi» ázirlengen.

Blokpostarda keptelisti boldyrmaý úshin jaýapty mekemeler sharýalarǵa ótinimdi toltyrýǵa jáne ol tizimdi ókiletti organdarǵa berýge kómek kórsetedi.

Sondaı-aq, aýylsharýashylyq tehnıkalaryn jóndeıtin jáne olarǵa qyzmet kórsetetin, tuqymdyq materıaldy, janar-jaǵar maı, aýylsharýashylyq tehnıkalary úshin qosalqy bólshekterdi, tyńaıtqyshtardy, ósimdikterdi hımııalyq qorǵaý quraldaryn, veterınarııalyq preparattardy jáne bıologııalyq materıaldyń synamalaryn jetkizetin otandyq jáne sheteldik kompanııalardyń kólikteri «jasyl dáliz» arqyly ótkizilýde.

Jergilikti jerlerde kóktemgi egis jumystaryna qyzmetkerlerdi ortalyqtandyrylǵan túrde biryńǵaı jetkizý máseleleri sheshilýde.

Aımaq basshysy atap ótkendeı, bıyl aımaqta 4,9 mıllıon gektarǵa jýyq alqapqa jazdyq egin egý josparlanǵan. Onyń 4 mıllıon 438 myń gektaryna burshaqty jáne dándi daqyldar sebiledi. Bul rette 3 mıllıon 734 myń gektar nemese egis alqabynyń barlyq kóleminiń 77 paıyzyna óńirdiń negizgi azyq-túligi – jazdyq bıdaı egiledi. Bıyl bıdaı alańy aıtarlyqtaı keńeıip, 2019 jylǵa qaraǵanda 150 myń gektarǵa artady.

700 myń gektardan astam jerge - arpa, suly, jasymyq jáne burshaq egiledi. Maıly daqyldardy 254 myń gektarǵa (2019 jylǵa qaraǵanda 600-ge artyq), azyqtyq shópti 181 myń gektarǵa (3 myńǵa jýyq artyq) ornalastyrý josparlanýda, kartop jáne kókónis alqabyn 2 myń gektardan 20 myńǵa deıin keńeıtedi. Óńirde kóktemgi egis naýqanyna daıyndyq belsendi júrgizilýde, búginde tuqym, tyńaıtqyshtar men tehnıka tolyǵymen daıyn.

Mınıstr S.Omarov Aqmola oblysynyń birqatar fermerlik sharýashylyqtaryn, atap aıtqanda Aqkól aýdanynda – «Eńbek» JShS, Býrabaı aýdanynda – «Ábdirahmanov» JK jáne «Jýravlevka-1» JShS aralady.

«Eńbek» JShS-da bıdaı, arpa, jasymyq, qaraqumyq, burshaq, júgeri, zyǵyr jáne túrli azyqtyq daqyldar egetin 32 myń gektarǵa jýyq alqap, «QazAgro» qarjylyq qoldaýymen satyp alynǵan «PETKUS» tuqymdy keptirý qýatty kesheni bar.

Aǵymdaǵy jyly seriktestik 13 myń gektarǵa, onyń ishinde 11,6 myń gektarǵa dándi jáne burshaqty daqyldar, 100 gektarǵa maıly daqyldar, 1 200 gektarǵa azyqtyq daqyldaryn egýdi josparlap otyr.

«Jýravlevka-1» JShS dándi-burshaqty jáne maıly daqyldardy ósiredi. Ótken jyly munda 34 myń tonnadan astam ónim alyndy.

Sharýashylyqta 54 myń gektar jer bar, onyń ishinde 40 myń gektardan astam egistik alqaby. Aǵymdaǵy jyly seriktestik 31 myń gektardan astam jerge, onyń ishinde 7,7 myń ga – bıdaı, 12,8 myń ga – arpa, 5,8 myń ga – raps, 4,4 myń ga – zyǵyr egýdi josparlap otyr.

Búgingi tańda sharýashylyq kóktemgi dala jumystaryna tolyq daıyn.