Saparhan Omarov agroónerkásiptik keshendi qoldaý sharalary týraly aıtty
«Agroónerkásiptik keshenniń básekege qabilettiligin arttyrý maqsatynda 2021 jylǵa deıingi memlekettik baǵdarlamasyn iske asyrý jalǵasýda. Ony iske asyrý kezeńinde salany damytý boıynsha qajetti sharalar qabyldandy. Memlekettik qoldaý kólemi tek sońǵy úsh jylda
1,5 ese ulǵaıyp, 2020 jyly 350 mlrd teńgege deıin jetti. Bul rette sýbsıdııalardyń 95 paıyzdan astamyn tikeleı aýyldyq jerlerde ornalasqan agroónerkásiptik keshen sýbektileri alady.
Agroónerkásiptik keshendegi sýbsıdııalaý barynsha ońaılatyldy jáne tolyqtaı avtomattandyryldy, bul sýbsıdııa berý protsesiniń ashyqtyǵyn qamtamasyz etýge múmkindik beredi», - dedi S. Omarov Senattaǵy aýyldyq aýmaqtardy damytý jónindegi parlamenttik tyńdaýda.
Onyń sózine qaraǵanda memlekettik qoldaý sharalaryn jetildirý sheńberinde ósimdik sharýashylyǵyndaǵy barlyq sýbsıdııalar Biryńǵaı qaǵıdalarǵa biriktirilgen. Ósimdikterdi qorǵaý quraldaryn sýbsıdııalaý keńeıtildi. Endi gerbıtsıdter ǵana emes, pestıtsıdterdiń basqa da túrleri sýbsıdııalanady. Basty jańalyqtardyń biri - sýbsıdııalardy kúntizbelik jyl aıasynda emes, tuqymdar, tyńaıtqysh, pestıtsıdter satyp alynǵan kúnnen bastap 12 aı boıy alýǵa bolady.
«Fermerler úshin qolaıly jaǵdaı jasaý maqsatynda mal satyp alýǵa kredıt berý kezinde kepil saıasaty ońtaılandyryldy. Máselen, kepilge maldyń ózi (85%) alynady, bul rette anyq kepilmen qamtamasyz etý nebári 15%-dy quraıdy.
«Qarjy quraldaryn jetildirý sheńberinde aınalym qarajatyn tolyqtyrýǵa arnalǵan kredıtter boıynsha syıaqy mólsherlemelerin sýbsıdııalaý normatıvi 5 paıyzdan 7 paıyzǵa deıin ulǵaıdy, egis jáne egin jınaý jumystaryn júrgizýge syıaqy mólsherlemesiniń 9 paıyzy sýbsıdııalanady.
Agroónerkásiptik keshen sýbektileri úshin jetkilikti kepildik bazasy bolmaǵan jaǵdaıda, ekinshi deńgeıli bankterdiń kredıtterine kepildik berý tetigi qoljetimdi boldy, ol Aýyl sharýashylyǵyn qarjylaı qoldaý qory arqyly iske asyrylady. Kepildikter kredıt somasynyń 50 paıyzyn jáne basym ınvestıtsııalyq jobalar boıynsha 85 paıyzdy quraıdy», - dedi mınıstr.
«Jyl saıyn QazAgronyń enshiles kompanııalary arqyly agroónerkásiptik keshendi qarjylandyrý kólemi ulǵaıýda, 2020 jyldyń 9 aıynyń qorytyndysy boıynsha ol
325 mlrd teńgeden astam somany qurady. Bul rette 2019 jyly QazAgronyń agroónerkásiptik keshendi kredıtteý kólemi shamamen 449 mlrd teńgeni qurady, bul Holdıng jumys istegen barlyq jyldardaǵy eń joǵary kólem bolyp otyr», - dedi S. Omarov.