Saparhan Omarov agroónerkásip keshenin erikti saqtandyrýdyń jańa júıesi jaıynda aıtty

NUR-SULTAN. QazAqparat – 2020 jyly 6 óńirde 115 myń gektar dándi jáne maıly daqyldar saqtandyryldy. Bul týraly halyqqa esep berý kezdesýinde QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«2020 jyldan bastap respýblıkada agroónerkásip keshenin erikti saqtandyrýdyń jańa júıesi iske qosyldy. Jańa júıede saqtandyrý syıaqylaryn 50 paıyz kóleminde sýbsıdııalaý túrindegi memlekettik qoldaý kózdeldi. Júıege saqtandyrý jaǵdaılary bastalǵan kezde tólemderdiń kepildigin qamtamasyz etetin halyqaralyq qaıta saqtandyrý kompanııalary tartyldy. Barlyq saqtandyrý protsesteri tolyǵymen avtomattandyrylǵan», - dedi ol.

Mınıstrdiń aıtýynsha, ósimdik sharýashylyǵy salasynda saqtandyrý ónimderi jáne alǵash ret mal sharýashylyǵynda iri qara maldy saqtandyrý bekitildi.

«Ónim mýltıtáýekeldi bolyp tabylady – táýekelder qataryna ınfektsııalyq jáne asa qaýipti aýrýlar, órt, úshinshi tulǵalardyń qaskúnemdik áreketteri, qaýipti tabıǵı nemese dúleı qubylystar, sondaı-aq jazataıym oqıǵalar – jarylys, naızaǵaıdyń túsýi, tunshyǵý, janýarlardyń shabýyl jasaýy jáne basqalar kirgizildi. Máselen, 2020 jylǵy kóktemgi dala jáne egin jınaý jumystarynyń qorytyndylary boıynsha astyq egiletin 6 óńirde 115 myń gektar dándi jáne maıly daqyldar saqtandyryldy. Saqtandyrý jaǵdaılarynyń nátıjesinde 518,2 mln teńge tólendi», - dedi Saparhan Omarov.