Saparbek Tuıaqbaev Investıtsııalar komıtetiniń tóraǵasy bolyp taǵaıyndaldy

ASTANA. QazAqparat - QR IDM Investıtsııalar komıtetiniń tóraǵasy bolyp Saparbek Quraqbaıuly Tuıaqbaev taǵaıyndaldy. Bul týraly QR Investıtsııalar jáne damý mınıstriniń keńesshisi jáne qoǵammen baılanys bóliminiń meńgerýshisi Berik Ýálı Feısbýktegi paraqshasynda habarlady.

«Búgin QR IDM Investıtsııalar komıtetiniń tóraǵasy bolyp Saparbek Quraqbaıuly Tuıaqbaev taǵaıyndaldy. Saparbek Quraqbaıuly buǵan deıin talaı qyzmette biliktiligimen, iskerligimen kózge tústi. Ońtústik Qazaqstan oblysy ákiminiń orynbasary bolyp bes jylǵa jýyq ýaqyt qyzmet atqardy. Saparbek Quraqbaıulynyń jańa qyzmetine sáttilik tileımin!» delingen habarlamada.

Saparbek Tuıaqbaev 1979 jyly týǵan, bilimi joǵary, mamandyǵy boıynsha halyqaralyq qatynastar bakalavry, gýmanıtarlyq ǵylymdar magıstri.

Eńbek jolyn 2005 jyly Qazaqstan Respýblıkasy Memlekettik qyzmet isteri agenttigi Memlekettik qyzmetti quqyqtyq qamtamasyz etý departamentiniń memlekettik qyzmet salasynda zańnamanyń saqtalýyn baqylaý bóliminiń bas sarapshysy bolyp bastaǵan.

2006-2009 jyldary Qazaqstan Respýblıkasynyń Reseı Federatsııasyndaǵy Elshiliginiń úshinshi hatshysy,  Qazaqstan Respýblıkasy Indýstrııa jáne saýda mınıstrligi Strategııalyq josparlaý departamenti vedomstvolyq baǵynystaǵy uıymdardyń qyzmetin úılestirý jáne baqylaý bóliminiń bastyǵy, Qazaqstan Respýblıkasy Indýstrııa jáne saýda mınıstrliginiń Hatshylyǵy - Strategııalyq josparlaý jáne jıyntyq taldaý departamenti strategııalyq josparlaý bóliminiń bastyǵy, Qazaqstan Respýblıkasy Prezıdenti Ákimshiligi Áleýmettik-ekonomıkalyq monıtorıng bóliminiń keńesshisi, Qazaqstan Respýblıkasy Prezıdenti Keńsesiniń keńesshisi,  Qazaqstan Respýblıkasy Prezıdenti Ákimshiligi Memlekettik baqylaý jáne aýmaqtyq-uıymdastyrý  jumysy bóliminiń memlekettik ınspektory qyzmetterin atqarǵan.

2012 jylǵy aqpannan Ońtústik Qazaqstan oblysy ákiminiń orynbasary bolǵan.