Saparbaevqa Jambyl oblysynyń áleýmettik-ekonomıkalyq damý kórsetkishteri baıandaldy
TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken apparat jıynynda óńirdiń bıylǵy birinshi toqsandaǵy áleýmettik-ekonomıkalyq damýynyń qorytyndysy qaraldy. QazAqparat bul týraly aımaq ákimdiginiń resmı saıtyna silteme jasap habarlaıdy.
Jambyl oblysynyń ákimi Berdibek Saparbaev óz qyzmetine kiriskennen keıin aǵymdaǵy jyldyń birinshi toqsanyndaǵy ekonomıkalyq kórsetkishterdi ótken jyldyń sáıkes kezeńinen tómendetpeý mindetin alǵa qoıǵany belgili. Alaıda naqty faktorlardy eskere otyryp, bul oraıda keıbir óndiristik kórsetkishter boıynsha tómendeý nátıjeler kútilýde. Oǵan ekonomıka damýynyń tejelýine ákep soqqan koronavırýs indetiniń taralýynyń aldyn alý boıynsha qabyldanǵan sharalar sebep boldy deýge negiz bar. Degenmen, basqa da faktorlar joq emes.Olardyń negizgilerine – ónerkásip salasyndaǵy «Qazfosfat» JShS sary fosfor shyǵaratyn peshiniń jáne Taraz ben Merki aýdanyndaǵy qant zaýyttary jumystarynyń toqtaǵanyn jatqyzýǵa bolady.
Jıynda óńir basshysy bıýdjettiń kiris bóligin tolyqtyrýdyń qosymsha kózderin izdestirýdi, sonyń ishinde 2,7 mıllıard teńgeden astam qarjyny quraıtyn bereshekke nazar aýdarýdy tapsyrdy. Sondaı-aq ShOB sýbektilerin ákimshilendirýdi kúsheıtý, zeınetaqy jarnalary men MÁMS jarnalarynyń tolyq túsýin qamtamasyz etý, kommýnaldyq múlik nysandaryn túgendeýdi aıaqtaý qajettigi aıtyldy.
Turǵyndar ekonomıkanyń ósýin nemese quldyraýynyń basty kórsetkishin azyq-túlik baǵasy boıynsha saralaıdy desek, oblys ákiminiń orynbasary Nurjan Kalenderovtyń aıtýynsha, áleýmettik mańyzy bar 19 azyq-túlik túriniń 5-i boıynsha baǵa óskendigi baıqalsa, al, kartop qunynyń 20 paıyzdan astam qymbattaýy tirkelgen.
«Baǵa monıtorıngi boıynsha mobıldik toptardy ne úshin qurdyq? Kókónis, qant, ıaǵnı ózimiz óndiretin ónimderdiń baǵasy ósken. Eshkim baǵanyń qymbattaý sebepterine taldaý jasamaıdy. Tıisti basqarmalar tek aqparat jınaýmen jáne faktilerdi anyqtaýmen aınalysady. Nege fermerlerdiń qoımalaryndaǵy azyq-túlik qoryna taldaý júrgizbeısizder? Olar ózderindegi artyq ónimderin naryqqa shyǵarý jolynda jumys jasaý kerek. Bul sharany qazir qolǵa alýdyń mańyzy zor», - dedi óńir basshysy.
Aýdan ákimderiniń esepterin tyńdaǵan Berdibek Saparbaev olardy salyq jınaý jumystaryn jyldyń sońǵy toqsanyna qaldyrmaýǵa shaqyryp, ártúrli áleýmettik tólemderdiń mólsheri osy túsimge baılanysty ekendigin basa aıtty.
Óńir basshysy jaqyn arada daǵdarysqa qarsy sharalar úshin qosymsha qarajat túsetinine nazar aýdartyp, onyń ıgerilýin on kún saıyn baqylap otyrýdyń mańyzdylyǵyn eskertti.
«Qandaı kompanııalar jumysqa tartylatynyn, olarda tehnıka men mamandardyń bar-joǵyn naqtylap alý qajet. Negizinen bul qarajatty jergilikti kompanııalardy qoldaýǵa baǵyttaý qajet. Jergilikti shıkizat pen qurylys materıaldaryn paıdalanýǵa taldaý júrgizý, keminde 22 myń jumys ornyn qurý kerek. Sondaı-aq, kóktemgi egis jumystaryn sapaly jáne ýaqytyly júrgizý qajet. Paıdalanylmaı jatqan jerlerdi aýyl sharýashylyǵy aınalymyna qaıtarý, sýarmaly egistikti ulǵaıtý jáne joǵary sapaly tuqymdardy paıdalaný máselelerine aıryqsha den qoıǵan abzal»,- dep atap ótti aımaq basshysy.
Basqosýda óńirde «Aýyl – el besigi» baǵdarlamasyn iske asyrýdy jandandyra túsý kerektigi aıtyldy. Daǵdarysqa qarsy sharalar tsıfrlandyrý jáne zamanaýı tehnologııalardy paıdalaný, elektrondyq saýdany damytý protsesin odan ári jyldamdatýǵa yqpal etýi múmkindigine de kóńil bólindi.
«Nysandar men qoǵamdyq paıdalaný oryndaryn dezınfektsııalaý jumystaryn kúsheıtý kerek. Qajet bolǵan jaǵdaıda bul jumystarǵa áskerı mamandardy belsendi túrde tartý qajet. Medıtsınalyq qyzmetkerlerge bir jolǵy járdemaqylar men Úkimet tarapynan taǵaıyndalǵan syıaqylardy ýaqytyly tóleýdi áleýmettik qyzmetter barynsha qarastyrý kerek», - dep túıindedi óz sózin Berdibek Saparbaev.
