Saparbaev jumyssyzdyq járdemaqysyn qalaı kóbirek alýǵa bolatynyn aıtty
NUR-SULTAN. QazAqparat - Qazaqstanda jumyssyzdyq boıynsha tólenetin memlekettik járdemaqy merzimi 4 aıdan 6 aıǵa uzartylmaq. Bul týraly búgin halyqpen eseptik kezdesý ótkizgen QR Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.
Kezdesý barysynda jumyssyz júrgendikten memleket tarapynan járdemaqy alyp otyrǵan Nur-Sultan qalasynyń turǵyny Sáýlet Tutqabaev bos jumys ornyn usynǵan mekemelerge barǵanymen, olardyń jalaqysy tómen ekendigin aıtady. Osy rette ol mınıstrge eki suraq qoıdy.
«Birinshiden, járdemaqy nelikten tómen mólsherde beriledi? Ekinshiden, osy jaǵdaıda men ne isteýim kerek? Soǵan jaýap alsam», - dedi ol.
«Eń aldymen, jumys isteý kerek. Ekinshiden, járdemaqy jumyssyzdyqqa deıin alǵan jalaqyǵa baılanysty bolady. Odan keıin, biz kúndelikti qansha bos jumys orny bar, qansha jumyssyz bar degen málimetterdi jınap otyramyz. Sol málimetterge sáıkes, qazirgi ýaqytta jumys oryndarynyń sany jumyssyzdardyń sanynan kóp. ıAǵnı, jumys jóninen másele joq. Baǵana men aıtpaı kettim, 2030 jylǵa deıingi jumys kartasyn jasadyq. Sonda bizge berilgen tapsyrma bar. Biz halyqty tolyq jumyspen qamtamasyz etý úshin jylyna eń kem degende 380 myń jumys ornyn ashýymyz kerek. Árıne, sizdiń aılyq az dep aıtyp turǵanyńyz durys. Biraq, az bolsa da soǵan barý kerek. Erteń jumys jaqsy júrse jalaqy kóteriledi. Árbir jumys berýshi jaqsy maman alǵysy keledi», - dep jaýap berdi mınıstr.
Sonymen qatar Berdibek Saparbaev jumyssyz júrgenderge tólenetin járdemaqy kólemin ózgertý qarastyrylyp jatqanyn aıtty.
«Qazirgi ýaqytta ol 4 aıǵa deıin ǵana tólenedi. Endi ony 6 aıǵa deıin tóleý oıda bar. Negizinen jumyssyz qalǵan azamattar tezirek Jumyspen qamtý ortalyqtaryna barýy kerek. Sol kezde sizdiń buryn alǵan jalaqyńyzdy esepteıdi, alatyn járdemaqy tómen bolmaıdy», - dedi ol.
