Saparbaev Joldaýdaǵy tapsyrmaǵa saı qandaı is-sharalar qolǵa alynatynyn aıtty
«Halyqtyń baspasózge qoljetimdiligin arttyrý úshin qoldanystaǵy normatıvtik-quqyqtyq qujattarǵa ózgerister engiziledi. Azamattyq qoǵamnyń 2025 jylǵa deıingi tujyrymdamasy daıyndalady. Qoǵamdyq uıymdardy arttyrý úshin olardyń normatıvtik-quqyqtyq aktilerine ózgerister enedi. Ózderińiz biletindeı, kelesi jyly ál-Farabıdiń 1150 jyldyǵyn, Abaı Qunanbaıulynyń 175 jyldyǵyn, elimiz egemendik alýynyń 30 jyldyǵyn, Altyn Ordanyń 750 jyldyǵyn atap ótedi. Soǵan baılanysty tıisti is-sharalar qabyldanady», - dedi Berdibek Saparbaev Úkimet otyrysynda.
Berdibek Saparbaevtyń aıtýynsha, qoldanystaǵy til jónindegi baǵdarlamaǵa ózgerister engiziledi.
«Bilimniń sapasyn arttyrý jóninde Memleket basshysynyń naqty tapsyrmasy bar. Qoldanystaǵy oqý baǵdarlamalaryna qazirgi zaman talabyna saı kerekti mamandyqtar boıynsha ózgerister engizý máselesi bar. Kelesi másele – aýyl men qala mektepterindegi bilim sapasynyń aıyrmashylyǵyn azaıtý. Soǵan baılanysty ásirese kishigirim mektepterdiń jaǵdaıyn jaqsartý, mektepterdegi muǵalimderdiń jaǵdaıyn jaqsartý, balalarǵa tıisti jaǵdaı jasaý jumystary qolǵa alynyp, qosymsha «Dıplommen aýylǵa» baǵdarlamasyna ózgerister enedi», - dedi ol.
Úkimet basshysynyń orynbasary óz sózinde bilimdi balalarǵa jaǵdaı jasaý baǵytynda Úkimetke tapsyrma berilgenin atap ótti.
«Osy jóninde Jol kartasyn daıyndaımyz. JOO-larǵa taldaý jasalyp, ekonomıkaǵa kerek emes mamandardy azaıtý týraly tapsyrma berildi. Qarjylandyrý salasynda da ózgerister bolady. Negizgi qarjylandyrýlar oblystyq deńgeıge ótkiziledi. Kelesi másele - ǵylymdy damytý. Qasym-Jomart Kemeluly ǵylymdy damytý jóninde tapsyrma berdi. Soǵan oraı úılesim keńesinde ózgerister bolady. Sondaı-aq, balalardy, otbasy ınstıtýtyn qorǵaý jóninde 2030 jylǵa deıingi tujyrymdama daıyndalady. Balalardyń arasyndaǵy qylmys, óz-ózine qol jumsaý máseleleri boıynsha jergilikti atqarýshy organdarmen tyǵyz jumys júrgiziledi», - dedi ol.
Berdibek Saparbaev sonymen qatar Memleket basshysy mádenıet jáne sport máselesine erekshe mańyz bergenin tilge tıek etti.
«Ózderińiz estigendeı, Memleket basshysy mádenıet salasyna erekshe kóńil bólip otyr. Ásirese, mádenıet salasy qyzmetkerleriniń jalaqysyn kóbeıtýge mańyz berildi. Sport salasynyń materıaldyq-tehnıkalyq bazasyn damytý jóninde naqty tapsyrma bar. Qazir salynyp jatqan 100 sport keshenin aıaqtaý jumysy bar. Osy salaǵa demeýshilerdi tartý mindeti bar», - dedi ol.
