Saparbaev jolaqyny kóterýdi suraǵan tasymaldaýshylardan sapaly qyzmetti talap etti
AQTÓBE. QazAqparat - Aqtóbede jergilikti bılik tasymaldaýshy kompanııalardyń tarıfti kóterý týraly usynysyna óz talaptaryn qoıyp otyr, dep habarlaıdy QazAqparat tilshisi.
Aqtóbelikter «avtobýstardyń ishi las, qoǵamdyq kólikterdiń ara qashyqtyǵy uzaq, qysta ishi salqyn, jazda ystyq, kondýktorlar dóreki, júrgizýshiler jyldamdyqty asyrady» degen shaǵymdy jıi aıtady. Búgin Aqtóbe oblystyq ákimdiginde osy máseleler taǵy aıtyldy.
«Qala turǵyndary áleýmettik jelilerde qoǵamdyq kóliktiń jumysyna jıi shaǵymdanady. Aqtóbelikter qozǵalys aralyǵynyń saqtalmaýyna, avtobýstardyń jaı-kúıine, júrgizýshiler men kondýktorlardyń minez-qulqyna shaǵymdanýda. Keshke qaraı avtobýstar erte toqtaıtyndyqtan, adamdar barar jerine jete almaıdy», - dedi oblys ákimi Berdibek Saparbaev.
Qalada qoǵamdyq kóliktiń jolaqysy - 55 teńge. Aqtóbe oblysy ákiminiń baspasóz qyzmetiniń habarlaýynsha, 50-baǵyt boıynsha qyzmet kórsetetin «Avtopark» JShS men «Aqtóbe qalasynyń Jolaýshylar tasymaly kásiporny» JShS ókilderi atalǵan máselelerdi joqqa shyǵarmaıdy. Olar «kólikterdiń tozyǵy jetti, avtoparktegi avtobýstardy jańartý men jóndeýge qarjy jetpeıdi» dep óz nusqalaryn jetkizdi. Qazirgi kezde qala ishindegi qoǵamdyq qatynas úshin 400-den astam avtobýs qajet bolsa, kúnine orta eseppen 310 avtobýsy shyǵady. Ári júrgizýshiler tapshy.
«Qoǵamdyq kólik júrgizýshisi 14-16 saǵat boıy jumys isteıdi. Jumysy aýyr, biraq eńbegine az jalaqy alady. Bul máseleni sheshý úshin júrgizýshilerdiń jalaqysyn kóterip, olardyń aýysymmen jumys isteýin uıymdastyrý qajet», - dedi qala ákimi Іlııas Ispanov.
Aıta keteıik, Aqtóbe qalasynda qoǵamdyq kóliktiń jolaqysy - 55 teńge. Kólikterdiń kóbi suıytylǵan gazben júredi. Degenmen tasymaldaýshylar jolaqy baǵasyn ósirý týraly birneshe ret usynys jasady. Ákimdiktiń de qoıar talaby bar. Aldymen qyzmet kórsetý sapasy arttyrýy shart. Keıin jolaqyny kóterý týraly usynys qaralady. Jergilikti bılik jolaýshylar aǵyny men ár baǵyttyń tıimdiligin anyqtaıtyn elektrondy bılet júıesin engizýdi josparlap otyr. Bul tasymaldaýshylardyń qarjylyq jaǵdaıyn naqty baǵalaýǵa jáne kóleńkeli bıznesti azaıtýǵa múmkindik beredi. Jıyn kezinde 2018 jyly arnaıy qurylǵan jumys toby tarıfterdi kóterý máselesin qarastyratyny aıtyldy.
