Saparbaev jemqorlyq týraly: Onyń ákesi, atasy sottalǵan degen jaqsy sóz emes
Aqtóbe oblysynyń pedagogtary búgin jańa oqý jylyna arnalǵan tamyz keńesine qatysty. Óńirde barlyǵy 398 mektep bolsa, onda 134 myńnan astam bala bilim alady. Oblysta 2 mektep úsh tilde dáris beredi. Qazirgi ýaqytta 27 mekteptiń qurylysy júrip jatyr. Onyń ishinde 9 mektep qyrkúıekte paıdalanýǵa berilmek.
«Bilim berý júıesin ońtaılandyrý boıynsha jumys jalǵasyp jatyr. Oblysta memlekettik normatıvke saı emes 40 mektep bar. Sońǵy úsh jylda 33 shaǵyn mektep qyzmetin toqtatty. 12 jyldyq bilim berý úrdisin eskerip, kontıngenti az, turǵyndardyń ósý dınamıkasy joq mektepterge taldaý júrgizý tapsyryldy. Áıteke bı, Qarǵaly, Qobda, Muǵaljar, Hromtaý aýdandaryndaǵy mektepterdi ońtaılandyrý qajet. Qaıta qurý jáne jabý boıynsha sheshim qabyldamas buryn balalardyń jan-jaqty bilim alýy úshin jaǵjaı jasalytynyn ata-anaǵa túsindirý suralady»,- dedi Aqtóbe oblystyq bilim basqarmasynyń basshysy Lázzat Orazbaeva.
Tamyz keńesi kezinde bilim salasyndaǵy jetistiktermen qatar, pedagogtar men basshylardyń para alý, berý jaǵdaılary týraly aıtyldy. Pedagogtar buryn basshylyq qyzmetti atqaryp, para alǵan jazasyn óteýshi Ákimgereı Kósherbaev sekildi birneshe adamnyń qylmystyq isin qarady. Beınerolık arqyly 2014 jyly para alǵany úshin sottalǵan Marat Ǵabıdýllınniń ókinishin tyńdady.
«Basshylyq qyzmette júrgende «maǵan bári bolady» dep oılap, qatelik jasadym. Qazir zaman basqa, zań basqa. Bizdiń artymyzda otbasymyz, baýyrlarymyz bar. Bizdiń qateligimizden tegimizge qara daq túsedi. Sondyqtan zańdy saqtap, jastarǵa durys tárbıe berýińizdi suraımyn»,- dedi jazasyn óteýshi M.Ǵabıdýllın.
Aqtóbe oblysynyń ákimi Berdibek Saparbaev eger basshy aqsha surasa dırektor muǵalimnen, muǵalim ata-anadan jınaıtynyn jasyrmady.
«Beınerolık basshylarǵa arnaıy kórsetildi. Eger bilim, densaýlyq saqtaý salasynda dál osyndaı qylmys jasalyp, bári aqshamen sheshilse, memlekettigimizge syn. Departament basshysy mektep dırektorynan aqsha alsa, dırektor muǵalimnen alady, muǵalim balaǵa jaqsy baǵa qoıý úshin ata-anadan suraıdy. Bul tek ózimizge emes, bolashaqqa syn bolatyn is. «Onyń ákesi nemese atasy sottalǵan» degen jaqsy sóz emes. Sondyqtan jaqsy urpaq tárbıeleımiz desek, adal eńbek etýimiz kerek»,- dedi oblys ákimi B.Saparbaev.