Saparbaev jastardy meıirimdi bolýǵa shaqyrdy

Aqtóbe oblysynyń ákimi Berdibek Saparbaev jastarmen kezdesip, olardyń atqaryp júrgen jumystarymen tanysty. Aqtóbelik jastar túrli jobalarǵa qatysyp, grant utyp alǵan. Olardyń biri qazir múmkindigi shekteýli azamattarǵa kómektesse, ekinshisi áleýmettik jaǵdaıy tómen otbasy balalaryna tegin aǵylshyn tilin úıretip jatyr. Jastarmen júzdesken óńir basshysy olardy tynbaı eńbek etip, jamandyqtan qashyq júrýge shaqyrdy.

«Eńbek etken adam jerde qalmaıdy. Adam ýaqytty tıimdi paıdalanýy kerek. Ómirge kelgende adam jan-jaqty damýy tıis. Eger 6 saǵat oqyp, keshke deıin jataqhanada bolyp, qarańǵy túskende túngi klýbty izdese ol adam ońbaıdy. Erteń bári kesh ekenin búgin túsingen jón. Qazir arandatýshylar, irtki salýshylar kóp. Aqsha berip, jymysqy áreketterin iske asyrǵysy keledi. Sol adamdarǵa erip, kóshege shyǵatyn bolsańyzdar, zań aıasynda jaýap beresizder. Máselen, keshe ǵana «Altyn belgimen» bitirgen túlek qylmys jasady. Eger 10-20 jyl túrmese otyrsa, ol qandaı azamat bolyp shyǵady»,- dedi óńir basshysy Berdibek Saparbaev.

Kezdesý kezinde meıirimdilik tanytyp, adamdarǵa jıi kómektesýdi, qoldan kelse qaıyrymdy ister jasaýǵa daıyn turýdy basa aıtty.

«Keıbir kezde múmkindigi shekteýli jan avtobýsqa mine almaı, teatrǵa, dúkenge kire almaı turady. Qyz-jigitter kórse de kórmegendeı ótip ketedi. Esterińizde bolsa, meıirimdi adam ǵana úlken adam bolady. Aqtóbede bul baǵytta kóp is atqarylyp jatyr. Alǵa aýdanynda arnaıy lager ashylyp, múgedek balalardyń tynyǵýyna jaǵdaı jasaldy. Múmkindigi shekteýli balalar da baqshaǵa barýy tıis. Al qyrkúıekte «Orysmyskompanııasy» JShS-niń demeýshiligimen aýtızm dertine shaldyqqan, múgedek balalarǵa arnalǵan ońaltý ortalyǵyn ashamyz. Bizde bul sanatta 3 myń bala bar»,- dedi oblys ákimi Berdibek Saparbaev.

Sonymen qatar, adam úshin eń jamany aldap-arbaý, kózboıaýshylyq pen qaǵaz júzinde ǵana isti tyńdyrý ekenin aıtyp, jastardy úsh nárseden qashyq júrýge shaqyrdy.