Saparbaev Jańatastaǵy órtten qaza bolǵan 5 balanyń ata-anasynyń shańyraǵyna bardy
TARAZ. QazAqparat – Jambyl oblysynyń ákimi Berdibek Saparbaev Jańatastaǵy páter órtinen kóz jumǵan bes balanyń ata-anasy men týystaryna baryp, Memleket basshysynyń atynan kóńil aıtty, dep habarlaıdy QazAqparat tilshisi.
Oblys ákimi marqumdardyń ata-anasynyń qara shańyraǵy ornalasqan Talas aýdany, Úsharal aýylyna arnaıy barǵan. Ol týraly aımaq basshysy Instagram men Facebook-tegi paraqshasynda jazdy.
«Búgin Talas aýdanynyń Úsharal aýylynda boldym. Jańatastaǵy órt saldarynan kóz jumǵan balalardyń ata-anasy qazir osyndaǵy qara shańyraǵynda. Ábdimálikovter otbasynyń qaıǵysyna ortaqtasyp, Memleket basshysynyń atynan kóńil aıttym. Prezıdent tapsyrmasyna sáıkes, qara jamylǵan januıaǵa jan-jaqty kómek kórsetilýde»,-dep atap ótken óz jazbasynda Berdibek Saparbaev.
Esterińizge sala ketsek, Jambyl oblysy Sarysý aýdany Jańatas qalasyndaǵy 2 yqshamaýdandaǵy 5 qabatty turǵyn úıdiń 3-shi qabatynda órt bolyp, 16 sharshy metr aýmaqty sharpydy. Órt saldarynan páterde úlkenderdiń qaraýynsyz qalǵan 2015, 2016, 2017, 2019 jáne 2020 jyly dúnıege kelgen bes sábı tútinge ýlanyp, jedel túrde aýrýhanaǵa jetkizildi. Alaıda araǵa biraz ýaqyt salyp, barlyǵy kóz jumdy. Aldyn ala málimet boıynsha, Jańatasta páterdegi órt tez tutanǵysh materıaldyń betine ashyq ot kóziniń túsýinen týyndaǵan.
Prezıdent Jańatas qalasynda qaza bolǵan balalardyń ata-analaryna kóńil aıtty.
