Saparbaev jańa maýsymǵa daıyn bolmaǵan Ortalyq stadıon basshylyǵyn synǵa aldy
AQTÓBE. QazAqparat - Aqtóbe oblysynyń ákimi Berdibek Saparbaev Ortalyq stadıonnyń jumysyn synady. Jylytý qubyrynyń qatyp, isten shyǵýyna baılanysty «Aqtóbe» óz alańynda «Qaıratty» qabyldaı almady, dep habarlaıdy QazAqparat tilshisi.
Aqtóbeniń ortalyq stadıony jańa maýsymǵa daıyn bolmaı shyqty. Buǵan deıin habarlaǵanymyzdaı, Qazaqstan fýtbol federatsııasy men Qazaqstan kásipqoı fýtbol lıgasynyń birlesken komıssııasy stadıondy tekserip, alańda alǵashqy oıyndy ótkizýge tyıym saldy.
«Aqtóbe» fýtbol klýbynyń ujymymen kezdesken óńir basshysy Berdibek Saparbaev Ortalyq stadıonnyń jumysymen tanysty. Stadıon dırektory Ashat Altybaevtyń aıtýynsha, jóndeý jumystary nashar bolǵandyqtan, alańnyń jylý berý júıesi isten shyqqan.
«Týyndaǵan máseleni der ýaqytynda habardar etpedińiz jáne olardy joıý úshin qajetti sharalardy jasamadyńyz! Eger qajetti jóndeý jumystary ýaqytynda ótkizilse, mundaı másele bolmaıtyn edi», - dedi oblys ákimi Berdibek Saparbaev.
Keıin ákim tıisti memlekettik organdarǵa bul máseleni erekshe baqylaýǵa alýdy jáne ony sheshý úshin qajetti sharalardy jasaýdy tapsyrdy.
Aqtóbe oblysy ákiminiń baspasóz qyzmetiniń habarlaýynsha, óńir basshysy demalys kúni «Delfın», «Shaǵala» jáne «Poseıdon» basseınderiniń jumysymen tanysty.
«Bıyl biz balalardy tolyqqandy damytý úshin barlyq jaǵdaıdy jasaýǵa baǵyttalǵan aýqymdy «Baqytty bala» jobasyn júzege asyramyz. Sondyqtan barlyq sporttyq jáne mádenı nysandar kúndelikti jumys isteýi kerek. Balalar, eresekterdiń demalys kúnderi osy oryndarǵa barýyna múmkindik jasalýy tıis», - dedi B.Saparbaev.
