Saparbaev jambyldyq kásiporynǵa jumysshylardyń jalaqy bereshegin tóleýdi tapsyrdy
TARAZ. QazAqparat –Jambyl oblysynyń ákimi Berdibek Saparbaev T.Rysqulov aýdanyna jumys sapary barysynda jumysshylary aldynda jalaqy bereshegi bar «Lýgovoı jylqy zaýyty» JShS-5a da arnaıy bardy, dep habarlaıdy QazAqparat tilshisi.
Sońǵy kezderi «Lýgovoı jylqy zaýyty» JShS birqatar keleńsizdikterge tap bolǵany belgili. Osydan az ǵana buryn onda qyzmetkerlerine jalaqy tóleýge qatysty másele týyndaǵan-dy. Birneshe aıdaǵy bereshek mólsheri 100 mıllıon teńgeden asqan. Qazirgi tańda qaryzdyń negizgi bóligi ótelgen. Jylqy zaýytynyń basshylarynyń biri Aleksandr Lınnıktiń aıtýynsha, qalǵan 18,2 mıllıon teńge jumysshylarǵa jaqyn arada tólenbek.
«Osy aıda memleketten bizge tıesili 46 mıllıon teńge mólsherindegi sýbsıdııany alǵannan keıin, birden jalaqy boıynsha barlyq boryshtardy óteıtin bolamyz. Bul aǵymdaǵy jyldyń qańtar jáne aqpan aılaryndaǵy tólemder. Keshiktirý bizdiń kinámizden emes, jetkizýshilerge qatysty oryn aldy», - dep túsindirdi ol.
Óńir basshysy barlyq qaryzdardy 20 naýryzǵa deıin tóleý qajettigin, sondaı-aq kásiporynda jumyskerlerdiń quqyqtaryn qorǵaýmen aınalysatyn kásipodaqtyń qurylýy tıis ekenin atap ótti.
Qazirgi ýaqytta kásiporyn qyzmetkerleriniń arasynda eń joǵary jalaqyny mehanızatorlar alady desek, olardyń aılyǵy - 350 myń teńgege deıin, al operatorlar 105 myń teńge alady. Buǵan qosa, jalaqy jyl saıyn 10 paıyzǵa ósip otyrady. Jumysshylar kúnine úsh ret tegin tamaqpen qamtamasyz etilgen, olardyń kásiporyn ónimderin jeńildetilgen baǵamen satyp alýǵa múmkindigi bar.
A. Lınnık syıymdylyǵy alty myń tonna bolatyn jer asty qoımasyn kókónis qoımasyna qaıta jabdyqtaý josparymen bólisti. Ol úshin barlyq jaǵdaı jasalǵan. Qoıma jeldetý júıesimen jabdyqtalǵan. Keńes zamanynda munda azyq-túlik saqtalǵan. Asfalt tóselip qana qoımaı, oǵan temirjol da tartylǵan. Oblys ákimi bul bastamany qoldap, ony «Taraz» ÁKK-niń qatysýymen júzege asyrýǵa ýáde berdi.
