Saparbaev: Jambylda 25 eldi mekenniń áleýmettik kartasy jasalǵan
Jambyl oblysynda 87 etnos ókilderi 25 eldi mekende tyǵyz shoǵyrlanǵan. Ol aýyldardyń áleýmettik kartasy jasalyp, jaýapty qyzmetkerler belgilengen. Etno kartada áleýmettik máseleler jáne onyń sheshý joldary qarastyrylǵan. Bul týraly Tarazda ótken «Qazirgi kezeńdegi etnosaralyq kelisim: tájirıbe men aldaǵy mindetter» atty halyqaralyq ǵylymı-praktıkalyq konferentsııady oblys ákimi Berdibek Saparbaev aıtty.
Atalǵan jıynǵa 200-den asa etnosaralyq qatynastar jáne konflıktologııa salasyndaǵy Reseı, Ýkraına, Izraıl, Bolgarııa, Ózbekstan memleketterinen kelgen jáne otandyq sarapshylar, Qazaqstan Respýblıkasy Parlamenti Májilisiniń depýtattary, Joǵarǵy Sottyń, Ulttyq ekonomıka, Іshki ister, Bilim jáne ǵylym mınıstrlikteriniń, fılosofııa, saıasattaný jáne dintaný ınstıtýttarynyń ókilderi qatysty.
«Halyq – toptastyrýshy, biriktirýshi, kúsh til. Memlekettik til – Qazaqstan azamatynyń paryzy, mindeti. Oblysta memlekettik tildi meńgergen eresek turǵyndardyń úlesi – 91,9%, basqa ult ókili – 66,4%-ǵa jetti. Oblysta etnomádenı birlestikterdiń sany turaqty túrde ósýde. Olardyń sany búgingi tańda 75-ke jetti»,-dedi sharanyń saltanatynda B. Saparbaev.
Sondaı-aq, aımaq basshysy tek aǵymdaǵy jyly etnomádenı birlestikterdiń demeýshileri men óner metsenattarynyń qoldaýymen 16 myńnan astam adamǵa 130,5 mıllıon teńge kóleminde qaıyrymdylyq kómek kórsetilgenin tilge tıek etti.
«Memleket basshysy Qasym-Jomart Toqaevtyń tapsyrmasyna sáıkes qolǵa alynǵan «Beıbitshilik pen kelisim» pılottyq jobasy toleranttylyqty nyǵaıtýda aıryqsha mańyzǵa ıe boldy. Joba aıasynda jyl basynan beri 145 eldi mekende kezdesýler ótip, turǵyndardy alańdatatyn negizgi máseleler anyqtaldy. Olardy sheshý úshin arnaıy Jol kartasy ázirlendi»,-dedi oblys ákimi.
Sonymen qatar B. Saparbaev byltyr bir ǵana Qordaı aýdanyndaǵy áleýmettik máselelerdi sheshýge 35 mlrd. teńge qarajat baǵyttalǵanyn jetkizdi. Búginde qordaılyqtardyń kógildir otynmen qamtylý kórsetkishi 95 paıyzdy, al taza aýyz sýmen qamtylýy 88 paıyzdy quraıdy.
