Saparbaev: Jalǵyz baspanasynan aıyrylǵan jetim balalarǵa úı tek zańdyq jolmen beriledi
ASTANA. QazAqparat - Aqtóbe oblysynyń ákimi Berdibek Saparbaev anasy alǵan nesıeni óteı almaı, jalǵyz baspanasyn bankke berýge májbúr bolǵan aqtóbelik jetim balalarǵa qatysty pikir bildirdi, dep habarlaıdy QazAqparat.
Óz pikirinde oblys ákimi balalarǵa kórsetiletin barlyq kómektiń zańǵa negizdelýi tıis ekenin basa aıtty.
«Qazaq jetimin jylatpaǵan. Balalar meniń qabyldaýymda boldy. Biz zańdy memleketpiz, páterdi zańdy berýimiz kerek. Adamı jaǵynan qaraǵanda biz kómektesýimiz kerek. Qala ákimdigi olarǵa jaldamaly páter berdi. Zańdyq turǵyda úı berý jaǵyn qarastyryp jatyrmyz. Eger zańsyz berse, prokýror qala ákimin nemese meni aıyptaýy múmkin», - dedi Berdibek Mashbekuly óńirlik BAQ ókilderimen ótken kezdesýde.
Eske sala ketsek, Aqtóbede anasy qaza bolǵan Sarqulovtar áýletiniń tórt balasy jalǵyz baspanasyn bankke berýge májbúr boldy.
