Saparbaev úzdik muǵalimderge syıaqy berdi

Aqtóbe oblysynda 17 myńnan astam ustaz bar. Qazirgi kezde «Nurly jol» baǵdarlamasymen, jergilikti bıýdjet esebinen 24 mektep salynyp jatyr. Jańa oqý jylynda 10 mektep paıdalanýǵa berilip, 4 mektep jyl sońyna deıin iske qosylady. Esep boıynsha óńir bıýdjetiniń 40 paıyzy bilim salasyna jumsalyp jatyr. Búgin Aqtóbe oblysynyń ákimi Berdibek Saparbaev bilim berý salasyndaǵy qyzmetkerlerin quttyqtady.

«Qasıetti, qadirli mamandyqtardyń biri - muǵalim. Kez kelgen adam, aqyn, jazýshy, ánshi, kúıshi, ushqysh bári muǵalimniń qolynan ótedi. Sol muǵalimnen qandaı bilim, tárbıe alsa, ol keleshekte de sondaı azamat bolady. Bárimiz ustazymyzdyń aldynda bas ıemiz. Qyzmet etip júrgenimiz, ómir súrip jatqanymyz sizderdiń eńbekterińizdiń jemisi. Memleket basshysy bilim berý júıesin damytýǵa erekshe kóńil bóledi. Prezıdent Aqtóbedegi jumys sapary kezinde materıaldyq-tehnıkalyq bazany nyǵaıtý, jańa bilim berý mekemelerin salý, muǵalimder úshin jaǵdaı jasap, oqýlyqtar men ádistemelik ádebıetterdiń qoljetimdiligine kóńil bóldi. Muǵalimge qamqorlyq basty basymdyqtardyń biri. Ekonomıkalyq daǵdarys kezinde de muǵalimder jalaqysynyń jyl saıyn ósýi qamqorlyqtyń erekshe ekenin kórsetedi. Eńbekterińiz úshin alǵys aıtamyz», - dedi oblys ákimi Berdibek Saparbaev.

Keıin oblystyń úzdik ustazdaryn marapattap, syılyqtar tabys etti. Al 4 ustaz «Ybyraı Altynsarın» medalin jáne 10 ustaz QR Bilim jáne ǵylym mınıstrliginiń alǵys hatyn aldy. «Qazaqstan Respýblıkasynyń bilim berý isiniń qurmetti qyzmetkeri» jáne «Eńbek ardageri» tósbelgilerin aldy. «Bilim berýdegi kóshbasshy»  oblystyq baıqaýynyń jeńimpazdary da qurmetke ıe boldy.

«Ustaz bolýdy bastaýysh synypta júrgende armandaǵan edim. Muǵalimime eliktedim. Bastaýysh synyp oqýshylaryn bilim nárimen sýsyndatý men úshin úlken mártebe. Muǵalim bolǵanym úshin ókingenim joq. Qaıta mamandyq tańdaý baqyty buıyrsa, qaıta muǵalim bolar edim. Balalar pák, taza adal. Oqýshylarymdy jaqsy kóremin», - dedi Muǵaljar aýdany Taldysaı orta  mektebiniń muǵalimi Raısa Balymbetova.