Saparbaev úsh aýysymdy mektepter jaıyn bilmeıtin bilim basqarmasynyń basshysyn synady
AQTÓBE. QazAqparat - Aqtóbe oblysynyń ákimi Berdibek Saparbaev apatty, úsh aýysymdy mektepter jaıyn tolyq bilmeıtin bilim basqarmasynyń basshysyn synady, dep habarlaıdy QazAqparat tilshisi.
Aqtóbede birinshi toqsannyń qorytyndysy shyǵaryldy. Áleýmettik-ekonomıkalyq kórsetkish turaqty. Jyl basynan beri 43,5 mıllıard teńge kóleminde ınvestıtsııa tartylyp, 2200 jańa jumys orny ashylǵan. Jospar boıynsha bıyl 31 myń aqtóbelik ýaqytsha, turaqty jumyspen qamtylady. Oblystyq jumyspen qamtý jáne áleýmettik baǵdarlamalar basqarmasynyń basshysy Qaırat Otarovtyń aıtýynsha, «Nátıjeli jumyspen qamtý jáne jappaı kásipkerlikti damytý» baǵdarlamasy boıynsha óńirge 4,8 mıllıard teńge bólindi.
Osy jyldyń alǵashqy úsh aıynda ónerkásip óndirisi 350,4 mıllıard teńgeni qurady. Túrli-tústi metall óndirisi 12 paıyzǵa, qurylysy materıaldarynyń óndirisi 29 paıyzǵa ósti. Aýyl sharýashylyǵy óniminiń kórsetkishi 24,5 mıllıard teńgeni qurady. Óńirde 148 aýyl sharýashylyǵy kooperatıvi quryldy.
«Birinshi toqsandy qalaı bastasaq, jyl solaı aıaqtalady. Biz jeltoqsanda jumys isteýdi úırengenbiz. Nege jyl aıaǵyndaǵy jaqsy jumys jyl basynda jalǵaspaıdy? Biz 10 kún qalǵanda júgire bastaımyz. Biz múmkindigimizge qaraı jumys isteýimiz qajet. Negizgi kórsetkishter boıynsha respýblıkada eń kem degende 5-orynda bolýymyz kerek»,- dedi oblys ákimi Berdibek Saparbaev.
Jıyn kezinde oblys ákiminiń orynbasary Asqar Bıahmetov óńirdiń ekonomıkalyq-áleýmettik damýyn tizbektep berdi. Jospar boıynsha jyl sońyna deıin barlyq aýdandar 3-6 jas aralyǵyndaǵy balalardy baqshamen qamtamasyz etý kerek. Sonymen qatar, 20 mektepke jobalyq-smetalyq qujat daıyndalyp jatyr.
«Qansha mektep apatty jaǵdaıda? Qansha mektep úsh aýysymda? Aýdandardy aralamaısyńdar, jaǵdaıdy bilmeısińder. Keshe Qobda aýdanynyń Ótek orta mektebinde boldym. Mektepke 28 jylda birde-bir ret jóndeý jumystary júrgizilmegen.
