Saparbaev únemi qoldap, kómektesip júrgen arýlarǵa alǵysyn bildirdi
AQTÓBE. QazAqparat - Búgin Aqtóbedegi belsendi qyz-kelinshekter, uzaq jyldar boıy eńbek etip, el damýyna úles qosqan analar men bala ósirip, zeınetke shyqqan ájeler erekshe iltıpatqa bólendi.
Oblys ákimi aýdan, aýyldan 700 qyz-kelinshekti shaqyryp, óz rızashylyǵyn bildirdi, dep habarlaıdy QazAqparat tilshisi.
Aqtóbede han saraıyndaı keń zal ishi búgin áıelder úshin ásemdelip, kómkerildi. Al arýlar men analar oblys ákiminen shaqyrtý alyp, arnaıy daıyndalǵan. Bári erekshe surý, júzderinen jylylyq esip tur. Báriniń tilegi bir. El tynyshtyǵy men amandyq. Olar bolashaqtyń jarqyn bolatynyna senimdi.
Bul kúnge qaladaǵy belsendi óner ujymdary jiti daıyndalǵan. «Kemal» teatry «Anaǵa hat» teatrlandyrylǵan kórinisin sahnalady. Al ánshi Marat Áıtimov qyz-kelinshekterdiń qoshemetine bólinip, án shyrqady.
« Qazaq tarıhynda sabyrly, aqylyna kórki saı, er minezdi analarymyz kóp bolǵan. Sizder solardyń izin jalǵastyryp júrsizder. Táýelsizdik jyldarynda elimizdiń qalyptasýyna, damýyna, abyroıynyń, bedeliniń artýyna sizderdiń qosqan úlesterińiz zor. Memleketimizde júrgizilip jatqan árbir memlekettik baǵdarlamaǵa sizder qatysyp júrsizder. Óndiriste, aýyl sharýashylyǵynda, kásipkerlikte, qurylysta áıelderdiń orny erekshe. Oblys basshylyǵy atynan qıyndyqqa shydap, barlyǵyn aqyl men bilimge salyp sheship júrgen názik jandylardy quttyqtaımyn. Bizderdi qoldap, kómektesip júrgenderińizge myń da bir rahmet aıtamyn»,- dedi oblys ákimi Berdibek Saparbaev. Óńir basshysynyń aıtýynsha, otbasyna uıytqy bolyp otyrǵan analardyń arqasynda elimizde yntymaq, bereke bar.
Saltanatty kesh kezinde kópbalala analarǵa «Altyn alqa», «Kúmis alqa» berildi. Olar bala tárbıelep, ult bolashaǵy jolynda urpaqqa tálim berip júrgen analar. Bul joly óńir basshysy qaladaǵy kópbalaly analardy ǵana emes, aýdan, aýyldaǵy názik jandylardy da quttyqtady. Kesh án men bıge ulasyp, ónerpazdar shaqyrylǵan qonaqtarǵa keremet kóńil-kúı syılady.
