Saparbaev úkimettik emes uıymdarǵa jańa ıdeıa jetispeıtinin aıtty
AQTÓBE. QazAqparat - Aqtóbe oblysynyń ákimi Berdibek Saparbaev úkimettik emes uıym ókilderimen kezdesti. Óńir basshysy jańa ıdeıalar men naqty usynystardyń joq ekenin aıtty, dep habarlaıdy QazAqparat tilshisi.
Aqtóbe oblysynda 600-den astam úkimettik emes uıym bar. Onyń 100-den astamy belsendi jumys istep tur. Oblystyq, respýblıkalyq bıýdjetten 384 mıllıon teńgeden astam qarjy bólinip, ıgerilip jatyr. Sonymen qatar, oblystyq basqarmalar, aýdandar áleýmettik máselelerdi sheshý jolynda qarjy bólip, mamandardyń kómegine júgindi. Búgin úkimettik emes uıym ókilderimen kezdesken Aqtóbe oblysynyń ákimi Berdibek Saparbaev óńirdegi ózekti degen máselelerdi qozǵady.
«Adamdardyń sana-sezimin ózgertý kerek. Ulttyq dástúrge, saltqa saı jastardy tárbıelegen jón. Ókinishke qaraı, memleket pen úkimettik emes uıymdar birigip jumys istep, sharalar uıymdastyrǵanymen, jastar arasynda qylmys, tártip buzý kóbeıip barady. Kún saıyn ishki ister departamentinen jedel aqparat alyp otyramyn. Qyzdardyń bir-birimen tóbeleskenin oqyp, júregiń aýyrady. Qyzdarymyz ne bolyp barady? Qyzdarymyz 15 jasynda balaly bolsa taǵy da júregimiz aýyrady. Erteńimiz, bolashaǵymyz ne bolady dep oılanamyz. Óz-ózine qol jumsaý faktisi azaıyp kele jatyr. Biraq áli de bolsa ǵalamtordyń, áleýmettik jelilerdiń damýy jastardyń sana-sezimine keri áserin tıgizedi»,- dedi óńir basshysy Berdibek Saparbaev.
Úkimettik emes uıymdar da qatelesedi. Olar bir rettik aktsııalardy, sporttyq jarystardy uıymdastyrýdy ádetke aınaldyrǵan. Bul sharalar tıimsiz, adamnyń sana-sezimin ózgerte almaıdy. 
«Dinı ekstremızm, terrorızmniń aldyn alý jumystaryna basa nazar aýdaryldy. Jastarmen, turǵyndarmen, sottalǵandarmen jumys kúsheıdi. Dintanýshylar men teologtar shaqyrylyp, bıyl 1 myńnan astam jeke, toptyq kezdesý ótti. Al áıelder uıymy otbasyndaǵy zorlyq-zombylyqtyń aldyn alý, ana men áke rólin arttyrýdy qolǵa aldy. Konferentsııa, dóńgelek ústelderdiń paıdasy az. Áleýmettik jobalardy iske asyratyn kezde jaqsy ıdeıalar kerek. Úsh jyldyq jospar quryp, sol baǵytta jumys isteý tıimdi dep esepteımiz. Al jyl saıyn jańa jospar qurý bastalǵan istiń aıaqsyz qalýyna ákelip soǵady»,- dedi «Aqtóbe oblystyq ÚEU qaýymdastyǵy» ZTB prezıdenti Aıgúl Dúısenova.
Aqtóbedegi úkimettik emes uıymdar Azamattyq bastamalardy qoldaý ortalyǵyna ǵımarat surady.
«Aqtóbe oblysyndaǵy barlyq salada jaqsy ıdeıa, usynys az. Jańa usynystaryńyz bolsa, biz qoldaýǵa daıynbyz, qarjy tabylady. Máselen, qaıyrymdylyq dúkeni birneshe aýdanda ashyldy. Biraq osy is aıaqsyz qaldy. Bizdiń aramyzda bútin kıimi joq adamdar bar. Olarǵa kómek berý kerek. Jaqsy isti bastap, tastap ketti. Eriktiler de azaıyp ketti. Jastar bos ýaqytyn tıimdi ótkizip, kúshin jaqsy isterge baǵyttaǵany durys. Sol kezde jastar arasyndaǵy qylmys azaıar edi. Aqtóbede stýdentterge tegin tamaq beretin ashana ashyldy. Ózge meıramhanalar da aıyna bir ret tegin túski as uıymdastyra alady. Tek bárin durys uıymdastyrý kerek»,- dedi oblys ákimi Berdibek Saparbaev.
