Saparbaev Úkimet basshysyna óńirde atqarylyp jatqan isterdi baıandady
AQTÓBE. QazAqparat - Aqtóbege eki kúndik jumys saparymen kelgen Úkimet basshysy Baqytjan Saǵyntaev kásipkerlermen kezdesý ótkizip jatyr.
Jıynǵa óńirdegi iri óndiris oryndarynyń basshylary men ınvestorlar qatysýda, dep habarlaıdy QazAqparat tilshisi.
Búgin «Nurly jer» baǵdarlamasy boıynsha salynyp jatqan turǵyn úılerdiń qurylysymen tanysqan Úkimet basshysy Baqytjan Saǵyntaev kásipkerlermen kezdesýde óńir ekonomıkasynyń damýyn tyńdady.
«Biz «Qazhrom» TUK» AQ-nyń Aqtóbe ferroqorytpa zaýytynda boldyq. Munda men birde-bir jumysshyny kórmedim. Bir aýysymda bar bolǵany 50 adam jumys isteıdi eken. Óndiristiń jańarýy degen osy. Zaýyt zamanaýı tehnologııamen salynǵan. El ekonomıkasynyń damýy da jańarýǵa baılanysty»,- dedi B. Saǵyntaev.
Jıyn kezinde oblys ákimi Berdibek Saparbaev Aqtóbeniń ekonomıkalyq, aýyl sharýashylyǵy, áleýmettik damýy týraly jan-jaqty aqparat berdi.
«Jyldyń bastaýy jaman emes. Negizgi áleýmettik-ekonomıkalyq kórsetkish ótken jyldyń sáıkes kezeńimen salystyrǵanda úsh paıyzǵa ósti. Ekonomıkany tehnologııalyq jańartý jolynda birqatar jumystar qolǵa alyndy. Jospar boıynsha óńirde 10 kásiporyn jańartylady. Onyń altaýy jumysyn toqtatqan óndiris orny. Solardy iske qosamyz. Barlyǵy 390 mıllıard teńge ınvestıtsııa tartylady. Esep boıynsha, óndiristi jańartýǵa aldaǵy bes jylda 40 mıllıard teńge jumsalady. Jańartý jumystary kezinde 3 myń adam jumystan bosatylady. Kásiporyndar olardyń 70 paıyzyna basqa jumys usynady. Al ózgesi qaıta oqytylady»,- dedi oblys ákimi Berdibek Saparbaaev.
Jıyn kezinde óńirdegi aýyl sharýashylyǵy salasynyń damýy da sóz boldy. Jospar boıynsha óńdeý salasyn jyl saıyn 7-8 paıyzǵa ósirý kezdelgen. Óńirde 129 aýyl sharýashylyǵy kooperatıvi bar.
«Nurly jer» baǵdarlamasy aıasynda 480 turǵyn úıdiń qurylysy bıyl aıaqtalyp, qyrkúıekte qoldanysqa beriledi. Qurylys kezinde qajetti materıaldardyń 80 paıyzy jergilikti jerden alynady. Al tsement, temir sekildi elimizde shyǵarylmaıtyn materıaldar Reseıden tasymaldanady. Bul úılerdiń baǵasy qoljetimdi. Ár sharshy metri 120 myń teńgeden aspaıdy. Aldaǵy jospar boıynsha baǵdarlama aıasynda aýmaǵy 1,2 mıllıon sharshy metr bolatyn 100 myń turǵynǵa arnalǵan jańa aýdan boı kóteredi»,- dedi oblys ákimi Berdibek Saparbaev.
