«Saparbaev tulǵasy»: Berdibek Máshbekulyna arnalǵan kitap tanystyryldy
ASTANA. KAZINFORM – Búgin QR Memlekettik qyzmet isteri agenttiginiń uıymdastyrýymen kórnekti memleket jáne qoǵam qaıratkeri, ekonomıka ǵylymdarynyń doktory Berdibek Máshbekuly Saparbaevtyń ómiri men qyzmet jolyna arnalǵan «Saparbaev tulǵasy» atty kitaptyń tusaýkeseri ótti.
Іs-shara QR Prezıdentiniń janyndaǵy Memlekettik basqarý akademııasynda ótti. Jıynǵa Prezıdent Ákimshiliginiń, Úkimet pen Parlamenttiń ókilderi, oblys ákimdikterinen ókilder, zııaly qaýym, memleket qaıratkeriniń áriptesteri men shákirtteri, otbasy músheleri, sondaı-aq Akademııa tyńdaýshylary qatysty.
Qazaqstan Respýblıkasynyń Memlekettik qyzmet isteri agenttiginiń tóraǵasy Darhan Jazyqbaı tusaýkeserdegi quttyqtaý sózinde Berdibek Mashbekulynyń 40 jyldan astam memlekettik qyzmettegi elimizdiń áleýmettik-ekonomıkalyq damýyna qosqan erekshe úlesin atap ótti.
Berdibek Saparbaev eńbek jolyn qatardaǵy qyzmetten bastap, bes oblystyń ákimi, Premer-mınıstrdiń orynbasary qyzmetine deıin kóterildi. Ol — memlekettik basqarý júıesin jetik meńgergen, el úshin janyn salyp eńbek etken tulǵa. Halyq Berdibek Máshbekulyn ádildigi men tabandylyǵy úshin «daǵdarys menedjeri» dep atady.
Kórnekti qaıratker eńbek demalysyna shyqqanda jastarǵa sabaq bersem degen oıyn júzege asyryp, ómiriniń sońyna deıin Memlekettik basqarý akademııasynda memlekettik qyzmetshilerge dáris oqydy. Berdibek Máshbekuly — tutas bir býyndy tárbıelegen, memlekettik qyzmette mektep qalyptastyrǵan tulǵa.
Qyrymbek Eleýuly óz sózinde Berdibek Máshbekulynyń el táýelsizdik alǵaly saıası sahnaǵa shyǵyp, myqty qarjyger, ultjandy, áleýmetshil azamat bolǵanyn, aımaqtardyń máselelerin sheshý úshin nátıjeli jumys istegenin atap ótti.
Sharaǵa qatysqan memleket jáne qoǵam qaıratkeri Baqbergen Dosmambetov, Memleket jáne qoǵam qaıratkeri Qýanysh Aıtahanov, QR Prezıdentiniń keńesshisi Baýyrjan Omarov sııaqty zamandastary jáne shákirti, Amanat partııasynyń atqarýshy hatshysy Dáýlet Káribek estelikterin bólisti. QR Parlamenti Senatynyń depýtaty Naýryzbaı Baıqadamov QR Senat tóraǵasy Máýlen Saǵathanuly Áshimbaevtyń arnaıy hatyn oqyp berdi.
Kitapty qurastyrǵan — Ulan Aıhojaev jáne Abaı Seıfýllauly. «Saparbaev tulǵasy» kitaby — tek bir adamnyń ómirbaıany emes, bul — memlekettik qyzmetke adaldyqtyń, elge jan-tánimen qyzmet etýdiń jarqyn úlgisi. Bul týyndy — el damýyna ólsheýsiz úles qosqan memleket jáne qoǵam qaıratkeriniń eńbek jolyn jastarǵa úlgi etip, jas memlekettik qyzmetshilerdiń tulǵalyq bolmysyn qalyptastyrý maqsatynda jaryq kórgen mańyzdy eńbek.
Aıta keteıik, Berdibek Saparbaevtyń Prezıdent Teleradıokeshenine bergen sońǵy suhbaty jaryq kórdi.